وتكەن جىلى 10 مىڭنان استام شەتەلدىك استانادا ەمدەلدى

استانا. قازاقپارات - بۇرىن دياگنوستيكا مەن ەمدەۋ شارالارىنىڭ وزىق ۇلگىلەرى تەك رەسپۋبليكالىق ەمحانالاردا عانا بولسا، بۇگىندە ونداي قىزمەتتەر قالالىق اۋرۋحانالاردا كورسەتىلەدى، دەپ حابارلايدى قازاقپارات ءتىلشىسى.

استانادا وتكەن مەديتسينا قىزمەتكەرلەرىن ماراپاتتاۋ سالتاناتى اياسىندا تاراتىلعان اقپاراتقا سايكەس، سوڭعى ەكى جىلدىڭ ىشىندە ەلوردادا جەدەل مەديتسينالىق كومەك كورسەتەتىن قالالىق ستانسى، بالالار اۋرۋحاناسى، ناركولوگيا جانە پسيحوتەراپيا ورتالىعى، تۋبەركۋلەزگە قارسى ديسپانسەر، قالالىق ەمحانا جانە تاعى باسقا مەديتسينالىق نىساندار سالىندى. «4№ قالالىق ەمحانادا سوڭعى ۇلگىدەگى گەرونتولوگيالىق ورتالىق اشىلدى. سونىڭ نەگىزىندە ساپالى دياگنوستيكالىق شارالاردى جۇرگىزۋگە مۇمكىندىك بار»، - دەلىنگەن رەسمي حابارلامادا.

بۇدان بولەك، بۇگىندە «Smart مەديتسينا» جوباسى ەنگىزىلىپ كەلەدى. نەگىزگى ماقسات - مەديتسينالىق مەكەمەلەردى تولىعىمەن اۆتوماتتاندىرۋ.

بارلىق شارالاردى ىسكە اسىرۋدىڭ ارقاسىندا قازاقستاننىڭ مەديتسينالىق قىزمەتتەرىنە جۇگىنەتىن شەتەلدىكتەردىڭ سانى ارتىپ كەلەدى. ماسەلەن، وتكەن جىلى استاناداعى مەكەمەلەردە 10,3 مىڭ شەتەل ازاماتى ەمدەلدى. ەكى جىل بۇرىن اتالعان كورسەتكىش 3,6 مىڭ ادام بولعان.

ايتا كەتەيىك، بۇگىن استانادا مەديتسينا سالاسى قىزمەتكەرلەرىنىڭ كۇنىنە ارنالعان سالتاناتتى شارا ءوتتى. سول جەردە قالا اكىمى اسەت يسەكەشەۆ ۇزدىك دارىگەرلەرگە پاتەر كىلتتەرىن تابىستادى.