08:52, 20 - مامىر 2017 | GMT +6
مىسىر «حانزاداسى» 10 ارىستانىمەن بىرگە استاناعا كەلەدى
استانا. قازاقپارات - مامىردىڭ 20 سى مەن ماۋسىمنىڭ 18 ى ارالىعىندا استانالىق سيرك ارەناسىندا مىسىردىڭ ەڭبەك سىڭىرگەن ءارتيسى حامادا كۋتانىڭ جەتەكشىلىگىمەن اڭىزعا اينالعان «10 ارىستان مەن مىسىر حانزاداسى» اتتراكسيونى كوپشىلىك نازارىنا ۇسىنىلادى، دەپ حابارلايدى قازاقپارات قالا اكىمدىگىنىڭ باسپا ءسوز قىزمەتىنە سىلتەمە جاساپ.
حامادا العاش رەت تورعا 2 جاسىندا كىرگەن، ال اڭ ۇيرەتۋدى 7 جاسىندا باستادى. بۇگىندە ول الەمدە ەشكىمنىڭ قولىنان كەلمەيتىن بىرەگەي تريۋكتاردى ورىندايدى. حامادا كۋتا سيرك اۋلەتىنە - 169 جىل. بۇل ونەرگە العاش بولىپ اجەسى Mahasen El Helow كەلگەن، ول اراب ەلدەرىندە اڭ ۇيرەتكەن تۇڭعىش ايەل. سونىمەن قاتار، باعدارلاما اياسىندا جونگلەرلار، اكروباتتار مەن كوڭىلدى سايقىمازاقتار ءوز كورەرمەندەرىن قۋانتپاق.
بۇدان باسقا، رەسەي مەن ەۋروپا فەستيۆالدارىنىڭ التىن جۇلدە يەگەرلەرى، گيننەستىڭ رەكوردتار كىتابىنا ەنگەن ۇلكەن ماسكەۋ سيركىنىڭ ارتيستەرى ونەر كورسەتەدى. ال اۋە گيمناستتارى ەشبىر ساقتاندىرۋسىز سيرك كۇمبەزىنىڭ استىندا 10 مەتردەن ارتىق بيىكتىكتە كۇردەلى تريۋكتاردى ورىندايتىن بولادى.