ەكسپو: قوعامدىق تاماقتانۋ ورىندارى 10 مىڭ شارشى مەتر اۋماققا ورنالاسادى
كورمە كەزىندە قوعامدىق تاماقتاندىرۋدى ۇيىمداستىراتىن جالعا الۋشى كاسىپورىنداردى ىرىكتەۋ ءۇشىن بايقاۋ ۇيىمداستىرىلدى. «استانا ەكسپو-2017» ۇلتتىق كومپانياسى كوممەرتسيالاندىرۋ دەپارتامەنتىنىڭ ديرەكتورى داۋلەت ەركىمبايەۆ بايقاۋدىڭ ارالىق ناتيجەسى تۋرالى ايتىپ بەردى.
«قىزمەت كورسەتۋ، ياعني سەرۆيس قاتىسۋشى مەملەكەتتەردىڭ ءبىرىنشى تۇلعالارى مەن دەلەگاتسيالارىنىڭ سونىمەن قاتار، قالا قوناقتارى مەن تۇرعىنداردىڭ كوڭىلىنەن شىعۋى كەرەك. بۇگىنگى كۇنى 15 كە جۋىق مەملەكەت وزدەرىنىڭ ۇلتتىق اسحانالارىن كورسەتۋ ءۇشىن تاماقتانۋ ورىندارىن ۇيىمداستىرعىسى كەلەتىنىن ايتتى. بۇل يتاليا، گەرمانيا، پولشا جانە ت. ب مەملەكەتتەر»، - دەدى د. ەركىمبايەۆ.
جالپى، كورمە كەزىندە تاماقتاندىرۋدى ۇيىمداستىرۋعا 10 مىڭ شارشى مەتر اۋماق ءبولىنىپ وتىر. بۇل جەرلەرگە 40 تان استام تاماقتانۋ ورىندارى ۇيىمداستىرىلادى. كوممەرتسيالىق پاۆيلونداردىڭ ءبىرىنشى قاباتتارىندا مەيرامحانا، كوفەحانا، بارلار ورنالاسادى. ەكىنشى قاباتتاردا ساۋدا ورتالىقتارىنداعى سەكىلدى فاست-فۋد بولادى.
تاماقتاندىرۋ ورىندارىن ۇيىمداستىرۋ كەزىندە حالىقتىڭ الەۋمەتتىك توپتارى مەن تابىس دەڭگەيى ەسكەرىلەتىن بولادى. «2016-جىلدىڭ سوڭىنان بايقاۋدى جارنامالاۋ باستالدى. اتاپ ءوتۋ كەرەك، بيزنەس بەلسەندى قاتىسىپ جاتىر. بۇگىنگى تاڭدا جالداۋشىلاردىڭ %71 انىقتالدى. جالداۋشىلاردى تاڭداپ العان كەزدە، ەڭ الدىمەن، قىزمەت كورسەتۋ ساپاسىنا، نارىقتىق تاجىريبەسى مەن قولجەتىمدى باعا ساياساتىنا نازار اۋدارىلادى. كاسىپكەرلىك سەكتوردى بايقاۋعا بەلسەندى قاتىسۋعا شاقىرامىز. سەبەبى بۇل وتاندىق وندىرۋشىلەرىمىزگە وزدەرىن كورسەتۋگە ارنالعان تاپتىرماس مۇمكىندىك»، - دەدى «استانا ەكسپو-2017» ۇ ك كوممەرتسيالاندىرۋ دەپارتامەنتىنىڭ ديرەكتورى.
ايتا كەتەيىك، قازىرگى تاڭدا 115 مەملەكەت پەن 18 حالىقارالىق ۇيىم وزدەرىنىڭ ەكسپو-2017 كورمەسىنە قاتىساتىندارىن راستادى.
