ۇكىمەت باسشىسى قازاقستاندىقتارعا 10 سوتىق جەر بەرۋ ماسەلەسىنە قاتىستى پىكىر ءبىلدىردى

 استانا. قازاقپارات - قازاقستاندىقتارعا 10 سوتىق جەر بەرۋ بۇل سالاداعى پروبلەمانى وڭ شەشۋگە سەپتىگىن تيگىزەدى.

بۇل تۋرالى بۇگىن ق ر پارلامەنتى پالاتالارىنىڭ بىرلەسكەن وتىرىسىندا دەپۋتاتتاردىڭ ساۋالىنا جاۋاپ بەرگەن ق ر پرەمەر- ءمينيسترى كارىم ءماسىموۆ ايتتى.

 «ەكونوميكا ءوسىمىن ىنتالاندىراتىن تەتىكتەردىڭ ءبىرى تۇرعىن ءۇي قۇرىلىسىن ودان ارى ارتتىرۋ بولىپ سانالادى. بۇل باعدارلامانىڭ جاڭا باعىتتارىنىڭ ءبىرى جەكە تۇرعىن ءۇي قۇرىلىسى ءۇشىن وبلىس اكىمدىكتەرى ارقىلى ينفراقۇرىلىم تارتۋ بولماق»، - دەدى ك. ءماسىموۆ.

 وسى رەتتە پرەمەر- مينيستر قازاقستاندىقتارعا جەكە تۇرعىن ءۇي سالۋ ءۇشىن 10 سوتىق جەر بەرۋ ماسەلەسىنە قاتىستى پىكىر ءبىلدىردى. «ءبىز ينفراقۇرىلىممەن قامتاماسىز ەتىلگەننەن كەيىن 10 سوتىق جەر ءبولۋ ماسەلەسى بۇل جاعدايدى شەشۋ ءۇشىن وڭ تۇزەتۋلەر ەنگىزەدى دەپ سانايمىز. سوندىقتان رەسۋرستىڭ ءبىر بولىگى جەكە تۇرعىن ءۇي قۇرىلىسى ينفراقۇرىلىمىن دامىتۋعا باعىتتالاتىن بولادى»، - دەدى ۇكىمەت باسشىسى.

 اۆتور: مارلان جيەمباي