استانا پوليتسەيى كىشكەنە بالانىڭ 10- قاباتتان قۇلاۋىنا جول بەرمەدى
بالانىڭ اناسى ءمادينا جۇمابەكوۆا ءتارتىپ ساقشىسىنا العىس ءبىلدىردى، دەپ حابارلادى استانا قالالىق ءى ءى د- نىڭ باسپا ءسوز قىزمەتىنەن.
«4 -ساۋىردە استانا قالالىق ءى ءى د جەدەل باسقارۋ ورتالىعىنا ەلوردا تۇرعىنىنان سارى ارقا كوشەسىندەگى ءۇيدىڭ 10- قاباتىنىڭ تەرەزەسىنە 4-5 جاستاعى بالا شىعىپ، ايقايلاپ جاتقانىن جانە كەز كەلگەن ساتتە تومەن قۇلاپ كەتۋى مۇمكىن ەكەندىگى جونىندە حابار»، - دەلىنگەن حابارلامادا.
جەرگىلىكتى پوليتسيا قىزمەتىنىڭ ۋچاسكەلىك ينسپەكتورى ءدىلشاد تويشىبايەۆ وقيعا ورنىنا كەلىپ، باسقادا شۇعىل قىزمەتتەردى شاقىردى.
ونىڭ ايتۋىنشا، ونىنشى قاباتتاعى اشىق تەرەزەنىڭ جاقتاۋىندا كىشىرەك قىز بالا تۇرعان. بالانىڭ ومىرىنە قاۋىپ ءتونىپ تۇرعانىن كورىپ، پوليتسيا قىزمەتكەرى ونىنشى قاباتقا كوتەرىلىپ، پاتەر ەسىگىن قاعادى. ابىروي بولعاندا، قىز بالا تەرەزەدەن كەتىپ، ەسىككە بارادى.
پوليتسەي ەسىكتىڭ ار جاعىندا تۇرىپ، قىز بالامەن اڭگىمەگە الدارقاتىپ، اناسى كوپ ۇزاماي كەلەتىنىن ايتىپ جۇباتقان. «سول كەزدە وقيعا ورنىنا كەلىپ جەتكەن استانا قالالىق ءى ءى د- نىڭ قىزمەتكەرلەرى پاتەردىڭ ىشىنە تەرەزە ارقىلى كىرگەن. پوليتسيا قىزمەتكەرى بالانىڭ اناسىمەن بايلانىسقا شىقتى. بالا امان- ەسەن اناسىنىڭ قولىنا تاپسىرىلدى»، - دەلىنگەن حابارلامادا.
بۇل - ەلوردا پوليتسەيلەرىنىڭ بيىك ۇيلەردەن قۇلاۋدان امان الىپ قالعان ءۇشىنشى بالا.
