گولوۆكيندى وليمپيادا ويىندارىنا قاتىستىرمايتىن 10 سەبەپ

استانا. قازاقپارات - اۋەسقوي بوكستىڭ حالىقارالىق اسسوتسياتسياسى (AIBA) كاسىپقوي بوكسشىلارعا وليمپيادا ويىندارىنا قاتىسۋعا رۇقسات بەرگەنى جايلى مالىمدەمە حالىقتىڭ قۇلاعىنا جەتكەلى بەرى ەل ىشىندە ءبىر عانا اڭگىمە جۇرگەن سىڭايلى.

ول - گەننادي گولوۆكين وليمپيادا ويىندارىنا قاتىسا ما؟ الايدا بوكسشىنىڭ تاراپىنان بۇعان قاتىستى ءالى بىردە- ءبىر ءسوز ايتىلعان جوق. دەسەك تە، اينالدىرعان بىرنەشە كۇننىڭ ىشىندە وسىعان بايلانىستى ءبىرقاتار مامان ءوز پىكىرىن جاريا ەتىپ، الەۋمەتتىك جەلىنىڭ قولدانۋشىلارى ءوز پايىمدارىن ورتاعا سالدى.

ارينە، كوپشىلىكتىڭ تۇجىرىمى قانداي سارىندا ەكەنى ايتپاسا دا بەلگىلى، الايدا بۇل سالانىڭ ماماندارى گولوۆكيننىڭ وليمپياداعا قاتىسپايتىنىن ايتىپ وتىر. ال ءبىز ءوز كەزەگىمىزدە سول مامانداردىڭ ايتۋى بويىنشا، WBA (Super) ، IBO، IBF جانە WBC (Interim) تۇجىرىمدارى بويىنشا ورتا سالماقتا الەم چەمپيونى گەنناديي گولوۆكيننىڭ وليمپياداعا قاتىسپاۋىنا سەبەپ بولاتىن 10 جايتتى نازارلارىڭىزعا ۇسىنامىز.

گولوۆكين سىندى چەمپيوندارعا وليمپيادانىڭ التىنى قىزىق ەمەس

2012 -جىلعى وليمپيادا چەمپيونى سەرىك ساپيەۆ Vesti.kz تىلشىسىنە بەرگەن سۇحباتىندا AIBA نىڭ كاسىپقوي بوكسشىلاردى وليمپياداعا قاتىستىرۋعا رۇقسات بەرگەنىنە قاتىستى پىكىرىن ايتتى. "ارينە، گولوۆكين كومەكتەسە الار ەدى، ءبىراق ول كەلىسە مە ەكەن، - دەيدى ساپيەۆ. - مەنىڭشە، ول كەلىسىم بەرمەيدى. بۇل وڭاي شەشىم ەمەس، ونىڭ كاسىپقوي بوكسقا وتكەنىنە كوپ ۋاقىت بولدى. چەمپيوندار مۇنداي ويعا بارا بەرمەيدى، ولارعا وليمپيادانىڭ التىنى قىزىق ەمەس".

گولوۆكين وليمپياداعا قاتىسىپ، مەدال السا عانا وعان اقشا تولەنەدى

ساپيەۆ گولوۆكيننىڭ ورنىندا بولسا وليمپياداعا قاتىسۋ تۋرالى شەشىمدى قابىلدايتىنىن ايتتى. "ەگەر ول وليمپياداعا قاتىسسا، ەشكىم دە اقشا تولەمەيدى، مەدال جەڭىپ السا عانا تولەنەدى، ەل دە العىسىن ايتادى. وليمپيادانىڭ ءبىر ءتيىمدى تۇسى - التىن مەدال الۋ ەلگە ابىروي اپەرەدى"، - دەدى ول.

گولوۆكيننىڭ كاسىپقوي بوكستاعى كەلىسىمشارتىندا ونىڭ قانداي دا ءبىر سپورت شاراسىنا قاتىسۋىنا شەكتەۋ بولۋى مۇمكىن

«ءبىراق ءبىر ماسەلەنى نازاردان شىعارماۋ كەرەك - كاسىپقوي بوكسشىلاردىڭ كەلىسىمشارتتارى بار، ولاردى بوكسشىلار بۇزا المايدى، ال كەلىسىمشارتتا قانداي دا ءبىر سپورت شارالارىنا قاتىسۋعا شەكتەۋ قويىلۋى مۇمكىن»، - دەدى ساپيەۆ.

گەنا وليمپياداعا قاتىسۋ ءۇشىن ىرىكتەۋ تۋرنيرلەرىنەن وتۋگە كەلىسپەۋى ىقتيمال

"وليمپياداعا قاتىسۋ ءۇشىن بەلگىلى ءبىر ىرىكتەۋ تۋرنيرلەرىنەن ءوتۋى كەرەك، ال گەنا وسىنىڭ بارلىعىنان، ماسەلەن ازيا چەمپيوناتىنان وتكىسى كەلە مە ەكەن؟ سەبەبى ول الەم چەمپيونى ءارى تانىمال بوكسشى. بۇل ماسەلەدە زاڭعا قاتىستى كەيبىر كەدەرگىلەر بار، ونىڭ بارلىعى ح و ك- پەن كەلىسىلۋى كەرەك"، - دەپ ءتۇسىندىردى ساپيەۆ.

گولوۆكين اۋەسقوي جانە كاسىپقوي بوكستا جەكپە- جەككە دايىندالۋ جۇيەسى ءارتۇرلى بولعاندىقتان وليمپياداعا قاتىسپاۋى مۇمكىن

بۇل ماسەلەگە قاتىستى بوكستان قازاقستان جاستار قۇراماسىنىڭ باس باپكەرى، گەنناديي گولوۆكيندى بۇرىن جاتتىقتىرعان عالىم كەنجەبايەۆ تا ءوز پىكىرىن ايتتى. ونىڭ ويىنشا، گولوۆكين وليمپيادا ويىندارىندا ونەر كورسەتپەيدى. "ۇلتتىق قۇراماعا كومەكتەسكىسى كەلەتىن گولوۆكيننەن باسقا كاسىپقوي بوكسشىنى بىلمەيمىن. دەگەنمەن گولوۆكين مۇنداي قادامعا بارۋ ءۇشىن اۋەسقوي بوكسقا كەلۋىنە تۋرا كەلەدى. اۋەسقوي جانە كاسىپقوي بوكستا جەكپە- جەككە دايىندالۋ جۇيەسى ءارتۇرلى"، - دەدى كەنجەبايەۆ.

گولوۆكيننىڭ اۋەسقوي بوكسقا ۋاقىتى جوق

كەنجەبايەۆتىڭ ايتۋىنشا، گولوۆكيننىڭ ماقساتى - كاسىپقوي بوكستا شىڭداردى باعىندىرۋ. ء"قازىر ول ءبىرىن ەكىنشىسىمەن شاتىستىرمايدى، ورتا سالماقتا بارلىق تيتۋلدى جەڭىپ الۋعا تىرىسادى. ءارى ۇلتتىق قۇراماعا ەنۋ ءۇشىن شارالارعا قاتىسىپ، ليتسەنزيا جەڭىپ الۋعا تۋرا كەلەدى. مۇنىڭ بارىنە ۋاقىت كەتەدى. ال گولوۆكيننىڭ ءقازىر ءوز جوسپارلارى بار. اۋەسقوي جانە كاسىپقوي بوكس - ەكى بولەك دۇنيە"، - دەدى ول.

گولوۆكيننىڭ وليمپياداعا قاتىسۋىنا ونىڭ باسشىلارى رۇقسات بەرمەۋى مۇمكىن

گولوۆكيندى تۇڭعىش رەت الەم چەمپيوناتىنا دايىنداپ، كومانداسىن باستاپ الىپ بارعان، ق ر ەڭبەك سىڭىرگەن جاتتىقتىرۋشىسى اسقاربەك عازيزوۆتىڭ ويىنشا، گەننادييدىڭ وليمپياداعا قاتىسۋ نەمەسە قاتىسپاۋى جالعىز ونىڭ عانا شەشىمى بولماۋى مۇمكىن. "سەبەبى وعان گەننادييدىڭ باپكەرىنىڭ، مەنەدجەرلەرىنىڭ، پروموۋتەرلەرىنىڭ دە تىكەلەي قاتىسى بار. "گولوۆكين وليمپياداعا قاتىسا ما؟" دەگەن سۇراققا جاۋاپ بەرۋ ءۇشىن الدىمەن ولاردىڭ AIBA- مەن قارىم- قاتىناستارىن جانە گەنانىڭ كومانداسىنىڭ مۇنداي شاراعا قاتىستى ويىن ءبىلۋ قاجەت. ءتىپتى ونىڭ مەنەدجەرلەرىنىڭ ءوزى گولوۆكيننىڭ وعان قاتىسۋىنا رۇقسات بەرمەۋى مۇمكىن"، - دەيدى عازيزوۆ.

كاسىپقوي بوكس - بيزنەس

عازيزوۆتىڭ ايتۋىنشا، گولوۆكينگە وليمپيادا قىزىق بولۋى دا مۇمكىن. "سەبەبى، وليمپيادانىڭ اتى وليمپيادا. ارينە، ونىڭ قازىرگى دارەجەسى الدەقايدا جوعارى. ءبىراق كەزىندە سول وليمپياداعا قاتىسىپ، جەڭىلىپ قالعان ەدى. ال ءقازىر دايىندالىپ، قاتىساتىن بولسا ونىڭ جەڭۋگە 99,9 پايىز مۇمكىندىگى بار دەپ ويلايمىن. دەگەنمەن، ءقازىر گەنناديي مەن ونىڭ باپكەرى كەلىسىم بەرگەن كۇننىڭ وزىندە، ودان جوعارى باسشىلىق تىيىم سالۋى مۇمكىن. سەبەبى كاسىپقوي بوكس دەگەن ول - اقشا، ول - بيزنەس"، - دەيدى ول.

وليمپيادا AIBA مۇددەسى ءۇشىن عانا "ۇسىنىلعان" شارا، گولوۆكين قاتىسا قويار ما ەكەن...

سپورت جۋرناليسى، ساراپشى نۇرعازى ساسايەۆتىڭ ويىنشا، AIBA بۇگىندە كاسىپقوي بوكسقا قىزىعا قارايدى. سەبەبى كاسىپقوي بوكس - سۋداي ساپىرىلعان اقشا، كورەرمەندەرى كوپ. تەلەتاراتىلىم ارقىلى كورەتىن پايداسى شاش- ەتەكتەن. ءتىپتى بوكسشى جۇلدىزدارىنىڭ اتاق- داڭقتارى دا بارىنەن اسىپ تۇر. "AIBA بۇگىندە كاسىپقوي بوكسقا قالاي كىرىپ، قالاي بىرىگىپ كەتەرىن بىلمەي ءجۇر. ءار ءتۇرلى بوكس كەشى باعدارلامالارىندا وزدەرىنىڭ APB جوباسىنداعى بوكسشىلارىن جەكپە- جەككە شىعارىپ، كاسىپقوي بوكستى توڭىرەكتەپ ءجۇر. ولاردىڭ ايتاتىن ۋاجدەرى - كاسىپقوي بوكستاعى سپورتشىلاردىڭ ءبارى اۋەسقوي بوكستان اۋىسقاندار. ياعني "تاۋار 100 پايىز بولماسا دا، 95 پايىز بىزدىكى" دەيدى. AIBA كاسىپقوي بوكستاعى جۇلدىزداردى وزدەرىنە قاراتۋ ءۇشىن ەندى قولىنداعى ەڭ قىمباتىن، ياعني وليمپيادا ويىندارىن "ۇسىنىپ" وتىر. ءبىراق وعان كاسىپقوي بوكس جۇلدىزدارى سالىپ ۇرىپ، جەتىپ بارا قويار ما ەكەن؟ !"، - دەيدى ول.

گولوۆكين ءۇشىن وليمپيادا ويىندارىنا قاراعاندا ءوز الدىنا قويعان جوسپارلارى ماڭىزدىراق

ساراپشىنىڭ پىكىرىنشە، گولوۆكين ءۇشىن وليمپيادا ويىندارىنان گورى ءوز الدىنا قويعان جوسپارلارى ماڭىزدىراق. "تۇيەنىڭ تانىعانى - جاپىراق" دەگەندەي، كاسىپقوي بوكس جۇلدىزدارىنىڭ "تانىعانى" - ميلليونداعان گونورار. سوندىقتان، مەن مۇنى AIBA- نىڭ كوپشىلىكتى وزىنە قاراتۋ ءۇشىن جاساپ وتىرعان PR- قادامى دەپ قانا تۇسىنەمىن. كاسىپقوي بوكستاعى ءار ءتۇرلى تۇجىرىمداردىڭ باسشىلارىنا وي سالۋ، ولاردى مامىلەگە كەلۋگە شاقىرۋ، "سابالارىنا ءتۇسىرۋ" دەپ پايىمدايمىن. ويتكەنى مۇنىڭ ەشقانداي ەرەجەسى، قالاي جۇزەگە اسىرىلاتىنى تۋرالى ەشبىر تالاپ- شارتتارى ۇسىنىلىپ وتىرعان جوق. ءسوز جۇزىندە "وت" تاستاپ، "قالاي بولار ەكەن" دەپ، سىرتتاي بارلاۋ عانا سياقتى. ال "گولوۆكين وليمپياداعا بارا ما؟ " دەگەن سۇراققا قاتىستى ايتار بولساق، گەنناديي سەكىلدى كاسىپقوي بوكستىڭ جارىق جۇلدىزدارىنا ءدال ءقازىر وليمپيادا ويىندارىنان گورى وزدەرىنىڭ الداعى جىلدارعا قۇرىپ قويعان جوسپارلارى ماڭىزدى دەپ ەسەپتەيمىن. ءوتىپ بارا جاتقان "كەرۋەنگە" قاراپ، داۋرىعۋدىڭ قاجەتى جوق. ءالىپتىڭ ارتىن توسۋ كەرەك. AIBA كاسىپقوي بوكستى ءوز قاناتىنىڭ استىنا تارتا الا ما، جوق پا، ونى ۋاقىت كورسەتەدى"، - دەيدى ساسايەۆ.

ساندۋعاش ءالىمجانوۆا

Kaz.tengrinews.kz