رەسەيگە جالعا بەرىلىپ وتىرعان 10 ميلليون گەكتار جەردى قايتارىپ الۋدى جالعاستىرا بەرگەن ءلازىم - ي. ادىربەكوۆ
ايتا كەتەيىك، جالپى وتىرىستا قازاقستان مەن رەسەي اراسىنداعى 929 مەملەكەتتىك ۇشۋ- سىناق ورتالىعىنىڭ وبەكتىلەرى مەن جاۋىنگەرلىك الاڭدارىن جالداۋ تۋرالى شارتقا وزگەرىستەر ەنگىزۋ تۋرالى حاتتاما قابىلدانعان بولاتىن.
«حاتتاماعا سايكەس، رەسەي تاراپى پوليگون ءۇشىن الىپ وتىرعان التى ءجۇز مىڭ گەكتارعا تارتا جەر ۋچاسكەسىن قايتارىپ بەرىپ وتىر. ارينە، بۇل رەسەي ءۇشىن وڭاي شەشىم بولماعانى انىق. دەگەنمەن، بۇل ەلباسىنىڭ ۇكىمەتكە جۇكتەگەن تاپسىرماسى ەكەنىن ايتا كەتۋ كەرەك. سوندىقتان دا، پوليگون ءۇشىن الىنىپ وتىرعان جەردىڭ قايتارىلۋى ەل يگىلىگىنە جۇمىس ىستەيدى دەپ سەنەمىن. ماسەلەن، اتىراۋ وبلىسىندا قانشاما حالىق وسىنىڭ كەسىرىن تارتىپ كەلدى. كەرەك بولسا، مەملەكەتتىڭ ءتيىستى كومەگىن دە الا الماعان، تۋعان بالالارىنا ءوز ەلىندە ءتيىستى كۋالىكتەرىن الۋعا دا مۇمكىندىگى بولماي قالعان كەزدەر بولعان ەدى»، دەدى ي. ادىربەكوۆ.
ونىڭ ايتۋىنشا، رەسەي جالعا العان اۋماقتا مىڭداعان گەكتار قۇنارلى جەرلەر بوس جاتىر. ونىڭ استىندا قازبا بايلىقتار دا بارشىلىق. ال پوليگون ايماعىنداعى قۇر جاتقان جەرلەر جىل وتكەن سايىن قۇنارىنان ايىرىلۋدا.
«ايتا كەتەرلىك تاعى ءبىر جاعىمدى جاڭالىق، وسى كەلىسىم كۇشىنە ەنگەننەن كەيىن «قازاەرونوۆيگاتسيا» وڭتۇستىك شىعىس ازيادان ەۋروپا باعىتىنداعى ترانزيتتىك مارشرۋتتارعا ەكى اۋە جولىن ۇسىنا الادى. ياعني، ەلىمىزدىڭ اۋە كەڭىستىگىندەگى ترانزيتتىك الەۋەتى ارتىپ، بيۋدجەتكە ءتۇسىم تۇسەدى. سوندىقتان دا، ءبىز رەسەي تاراپىنان بۇرىن پايدالانىپ كەلگەن جەرلەرىن زالالسىزداندىرۋدى قىسقا مەرزىمدى اياقتاۋىن تالاپ ەتۋگە ءتيىسپىز. بۇدان بولەك، ءالى دە رەسەيگە جالعا بەرىلىپ وتىرعان ون ميلليون گەكتار جەردىڭ باسىم بولىگىن ەل مۇددەسىنە قايتارىلۋىن جالعاستىرۋ بەرۋىمىز كەرەك»، دەدى سەناتور.
اۆتور: قانات مامەتقازى ۇلى
