قورعاستا 10 مىڭ تەڭگە پارا العان كەدەنشى ءومىر بويىنا مەملەكەتتىك قىزمەتتەن شەتتەتىلدى

استانا. قازاقپارات - الماتى وبلىسى ىلە اۋدانىنىڭ سوتى «قورعاس» حالىقارالىق شەكاراماڭى ىنتىماقتاستىعى ورتالىعىنىڭ كەدەن بەكەتىندە پارا العان الماتى وبلىسى بويىنشا مەملەكەتتىك كىرىستەر دەپارتامەنتىنىڭ باس مامانى ە. ورازالينگە قاتىستى ۇكىم شىعاردى.

بۇل تۋرالى الماتى وبلىستىق سوتىنىڭ باسپا ءسوز قىزمەتى حابارلاپ وتىر.

 «سوت انىقتاعانداي، لاۋازىمدى قىزمەتتى اتقارا وتىرىپ، ە. ورازالين جەكە كاسىپكەردەن  10000 تەڭگە كولەمىندە پارا العان. ناقتىراق ايتساق، كەدەنشى قازاقستان رەسپۋبليكاسىنىڭ شەكاراسى ارقىلى قىتاي حالىق رەسپۋبليكاسىنان تىيىم سالىنعان مەديتسينا پرەپاراتتارىن وتكىزگەن كاسىپكەردى اكىمشىلىك جازاعا تارتپاۋى ءۇشىن وسىنشا كولەمدە پارا سۇراعان»، - دەپ حابارلادى وبلىستىق سوتتىڭ باسپا ءسوز قىزمەتى.

سوت ە. ورازاليندى ق ر قىلمىستىق كودەكسىنىڭ 366-بابى، 1-تارماعى بويىنشا كىنالى دەپ تاۋىپ، جەكە باسىنا تيەسىلى مۇلكىن تاركىلەۋمەن قاتار،  500000 تەڭگە ايىپپۇل سالدى. سونىمەن قاتار، سوت ە. ورازالين ءومىر بويى جەرگىلىكتى ءوزىن ءوزى باسقارۋ ورگاندارىندا مەملەكەتتىك قىزمەت اتقارا المايدى دەگەن ۇكىم شىعاردى. «سوت شەشىمى ازىرگە زاڭدى كۇشىنە ەنگەن جوق»، - دەپ اتاپ وتكەن سوتتىڭ باسپا ءسوز قىزمەتى.

اۆتور: كەنجەكەي توقتامۇرات قىزى