تۇركىستان تاياۋ جىلدارى اينالىمى 10 ميلليارد تەڭگەنى قۇرايتىن ءوندىرىس الاڭىنا اينالماق
بۇل ورايدا، وڭىرلەردىڭ تىنىسىنا كوز جۇگىرتسەڭىز ىلكىمدى ىستەردىڭ بوي كورسەتىپ كەلە جاتقانىن بايقاۋعا بولادى. سونىڭ ءبىر كورىنىسى رەتىندە اۋىل شارۋاشىلىعى مەن ونەركاسىبى قاتار دامىپ كەلە جاتقان تۇركىستان يندۋستريالدى ايماعىنىڭ يننوۆاتسيالىق جوبالاردى جانداندىرۋعا قوسار ۇلەسى.
قالا اكىمىنىڭ ورىنباسارى ت. مۇسايەۆتىڭ ايتۋىنشا جالپى اۋماعى 40 گەكتاردى قۇرايتىن يندۋستريالدى ايماققا اۆتو جول، تەمىر جول، ەلەكتر قۋاتى، سۋ، سارقىندى سۋ جۇيەلەرى تارتىلعان. سونىمەن بىرگە، الداعى ۋاقىتتا ايماقتىڭ سىيىمدىلىعىنا قاراي كولەمىن ۇلعايتۋ كوزدەلىپ وتىر.
جالپى ءوندىرىسىن دامىتىپ، ونى تاسىمالداۋ ماسەلەسىنە كەلسەك، توعىز جولدىڭ تورابىنداعى تۇركىستاننىڭ مۇمكىندىگى مول. جەرگىلىكتى باسشىلىقتىڭ ايتۋىنشا «الماتى- ماسكەۋ» تەمىرجولى، «باتىس قىتاي - باتىس ەۋروپا» اۆتو ءدالىزى ءوتىپ جاتقان ءوڭىردىڭ لوگيستيكالىق مۇمكىندىگىنە قاراي يندۋستريالدى ايماقتا ورنالاسۋعا نيەت ءبىلدىرىپ وتىرعان ينۆەستورلار بارشىلىق. ءبىراق، سولاردىڭ اراسىنان يننوۆاتسيالىق جوبالارعا ەرەكشە ءمان بەرىلىپ وتىر.
قازىر مۇندا جالپى سانى 9 جوباعا 20 گەكتاردان استام جەر بولىنگەن. ونىڭ ىشىندە يون الماستىرۋ سمولا ءونىمى، شىنىپلاستيكالىق ارماتۋرا، كۇن ساۋلەسىنەن بالامالى ەنەرگيا وندىرەتىن پانەل، سوڭعى تەحنولوگيالىق قۇرالدارمەن جابدىقتالعان جيھاز جانە قۇرىلىس ماتەريالدارىن شىعاراتىن جوبالارعا رۇقسات بەرىلگەن. وسى ورايدا قازىنادان بولىنگەن 850 ميلليون تەڭگە جۇمسالىپ قۇرىلعان يندۋستريالدى ايماق الداعى جىلدارى اينالىمى 10 ميلليارد تەڭگەنى قۇرايتىن ءوندىرىس الاڭىنا اينالماق.
ازىرگە، مۇندا 5 جوبانىڭ قۇرىلىس جۇمىستارى باستالىپتى. جىل سوڭىنا دەيىن 2 كىرپىش زاۋىتى جانە 1 شىنىپلاستيكالىق ارماتۋرا شىعاراتىن ءوندىرىس ورنى ىسكە قوسىلماق. بۇگىندە وسى جوبالاردىڭ اراسىنان ءبىر كىرپىش زاۋىتى ءوز جۇمىسىن باستاعان. ءبىر قاراعاندا كۇيدىرىلگەن كىرپىش ءوندىرىسىنىڭ مول ەكەندىگىن ەسكەرسەك، بۇعان وڭىردە سۇرانىس جوعارى. تۇركىستان قالاسىنىڭ اۋماعىندا تولىق جۇمىس ىستەپ تۇرعان جىلىنا 22 ميلليون دانا كىرپىش شىعاراتىن ەكى ءوندىرىس بار.
الايدا، قالانىڭ وزىندە ءجۇرىپ جاتقان قۇرىلىستارعا جىل سايىن شامامەن 40 ميلليون داناعا تارتا كىرپىش قاجەت. ونىڭ ۇستىنە، رەسپۋبليكا كولەمىندە تۇركىستان جانە سەمەي وڭىرلەرىندە وندىرىلەتىن كىرپىشكە قاجەتتى شيكىزات ساپاسى جوعارى بولعاندىقتان، تۇركىستانعا كورشىلەس وبلىستار مەن اۋدان، قالالاردان دا كەلەتىن تۇتىنۋشىلاردىڭ سانى مول. «سوندىقتان، كاسىپكەرلەردىڭ تۇركىستاننىڭ توپىراعىنان وندىرىلەتىن كىرپىش ءوندىرىسىن دامىتۋعا دەگەن قۇلشىنىستارى جوعارى» - دەيدى ت. مۇسايەۆ.
سونىمەن بىرگە، جەرگىلىكتى باسشىلىقتىڭ ايتۋىنشا، ايماقتاعى كاسىپورىندار تولىق وندىرىستىك قۋاتتىلىقتا جۇمىس ىستەسە 5 مۆت ەلەكتر قۋاتىن قاجەت ەتەتىن كورىنەدى. دەسە دە بۇل ماسەلە كوپ ۇزاماي ءوز شەشىمىن تاپپاق. ول ءۇشىن وسى ماڭنان تۇرعىن ۇيلەرگە جانە يندۋستريالدى ايماققا 16 مۆت ەلەكتر قۋاتىن تاراتاتىن قوسىمشا ستانسانى الداعى قاراشادا ىسكە قوسۋ جوسپارعا ەنگىزىلگەن، دەپ حابارلايدى تۇركىستان قالاسى اكىمىنىڭ باسپا ءسوز قىزمەتى.
