قازاقستان مۇسىلماندارى ءدىني باسقارماسىنىڭ جاڭادان اشىلعان سايتىنان 10 مىڭنان استام سۇراقتىڭ جاۋابىن تابۋعا بولادى

 استانا. قازاقپارات - بۇگىن استانادا ءوتىپ جاتقان قازاقستان مۇسىلماندارى ءدىني باسقارماسىنىڭ قاسيەتتى رامازان ايىنا ارنالعان ءتورالقا ماجىلىسىندە www.fatua.kz  سايتىنىڭ اشىلۋ ءراسىمى بولدى.

قازاقستان مۇسىلماندارى ءدىني باسقارماسىنىڭ نايب- ءمۇفتيى، ازىرەت سۇلتان مەشىتىنىڭ باس يمامى سەرىكباي قاجى ورازدىڭ ايتۋىنشا، بۇل سايت بىرەگەي بازا بولىپ تابىلادى. «سايتتا 10 مىڭنان استام سۇراقتارعا جاۋاپتار بەرىلگەن جانە بۇگىنگى تاڭدا 40 تان استام ساپالى، ومىرشەڭ، بۇگىنگى تاڭداعى ءتۇرلى جاعدايلارعا بايلانىستى پاتۋالار بار»، - دەپ اتاپ ءوتتى ول.

 سونىمەن قاتار، نايب- ءمۇفتيدىڭ ايتۋىنشا، ەكى جىل بۇرىن ق م د ب- دا اقپاراتتىق- ناسيحاتتىق توپ قۇرىلعان. «سونىڭ ناتيجەسىندە بۇل توپ رەسپۋبليكالىق جانە جەرگىلىكتى دەڭگەيدە اقپاراتتىق- ناسيحاتتىق جۇمىس جۇرگىزىپ كەلەدى. رەسپۋبليكالىق اقپاراتتىق- ناسيحات توبىندا 30 عا تارتا جوعارى بىلىكتى تەولوگ ماماندار مەن عىلىمي دارەجەلەرى بار ازاماتتارىمىز جۇمىس ىستەيدى. ال جەرگىلىكتى اقپاراتتىق- ناسيحاتتىق توپتارىمىزدا وبلىستىق، اۋداندىق، اۋىلدىق يمامدارىمىزدان قۇرالعان ۇجىم بار. ولاردىڭ جۇرگىزگەن جۇمىستارىنىڭ ناتيجەسىندە ەلىمىزدەگى 1,5 ميلليوننان استام وتانداستارىمىز اسىل ءدىنىمىز تۋرالى جان- جاقتى اقپاراتتاندىرىلدى. مۇنداعى باستى ماسەلە ەكسترەميزم، لاڭكەستىك جانە تەرىس اعىمداردان ساق بولۋ جونىندەگى ۋاعىزداردى تاراتۋ»، - دەپ ءتۇسىندىردى س. وراز.

 اۆتور: ءابۋ- اسقار مەكەش ۇلى