قازاقستاندىق عارىش اپپاراتى ءوزىن 10 جىلدا اقتايدى - ت. مۇسابايەۆ
بۇل تۋرالى بۇگىن پارلامەنت سەناتىنىڭ جالپى وتىرىسىندا ينۆەستيتسيالار جانە دامۋ مينيسترلىگى اەروعارىش كوميتەتىنىڭ ءتوراعاسى تالعات مۇسابايەۆ ءمالىم ەتتى
ەسكە سالايىق، جالپى وتىرىستا «2009 -جىلعى 6 -قازانداعى قازاقستان رەسپۋبليكاسىنىڭ ۇكىمەتى مەن فرانسۋز رەسپۋبليكاسىنىڭ ۇكىمەتى اراسىنداعى جەردى قاشىقتىقتان زوندتاۋدىڭ عارىش جۇيەسىن جانە عارىش اپپاراتتارىنىڭ قۇراستىرۋ- سىناۋ كەشەنىن قۇرۋ مەن پايدالانۋ شارتتارى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ قابىلدانعان بولاتىن.
توقتالا كەتەتىن جايت، 2014 -جىلى قازاقستاننىڭ جەردى قاشىقتىقتان زوندتايتىن ەكى عارىش اپپاراتى وربيتاعا شىعارىلعان. جوعارى جانە ورتاشا دالدىكتەگى بۇل اپپاراتتار ءالى دە قازاقستاننىڭ مەنشىگىنە وتپەگەنى بەلگىلى.
«بۇل عارىش اپپاراتتارى ەڭ الدىمەن مەملەكەتتىك مۇددەگە جۇمىس ىستەيدى، سوندىقتان دا ولاردىڭ وزدەرىن اقتالۋى بىردەن بولمايدى. ءتىپتى، ءوزىن- ءوزى ءومىر بويى اقتامايتىن جۇيەلەر دە بار. ال ءبىز ءوزىمىزدىڭ سپۋتنيكتەر مەن جالپى قازاقستاندىق عارىش جۇيەسىن 10 جىلدىڭ ىشىندە ءوزىن- ءوزى اقتايدى دەپ ەسەپتەپ شىقتىق. ارينە، بۇل ەڭ بىرىنشىدەن ۇكىمەتتىڭ قانداي شەشىم قابىلدايتىنىنا دا بايلانىستى. ەكىنشى ماسەلە، ونداي جۇيەنى ۇستاپ تۇرۋ ءۇشىن دە قاراجات كەرەك. ويتكەنى، مەملەكەتتىك ورگاندارعا عارىش اپپاراتتارىنان تۇسىرىلگەن سۋرەتتەردى تەگىن بەرەتىن بولساق، وندا عارىش اپپاراتىن ۇستاپ تۇرۋ ماسەلەسىن شەشۋگە ءتيىسپىز»، - دەدى ت. مۇسابايەۆ.
ايتا كەتەرلىگى، قازاقستاننىڭ مەملەكەتتىك ورگاندارى سۇراۋ سالۋ ارقىلى سپۋتنيكتەردەن شامامەن 10 ميلليارد تەڭگەنىڭ فوتوسۋرەتتەرىن الۋدا جوسپارلايدى. ال عارىشتىق جۇيەنى ۇستاپ تۇرۋ ءۇشىن شامامەن جىلىنا 450 ميلليون تەڭگە قاجەت ەكەن.
اۆتور: قانات مامەتقازى ۇلى
