قازاقستاندا تىكۇشاق وندىرىسىنە ۇلتتىق قوردان 10 ميلليارد تەڭگە بولىنەدى
بۇل تۋرالى بۇگىن ورتالىق كوممۋنيكاتسيالار قىزمەتىندە «نۇرلى جول» باعدارلاماسىن ىسكە اسىرۋ ماسەلەسىنە ارنالعان بريفينگتە ق ر ۇلتتىق ەكونوميكا ءمينيسترىنىڭ ءبىرىنشى ورىنباسارى مارات قۇسايىنوۆ ءمالىم ەتتى.
«اعىمداعى جىلدا داعدارىسقا قارسى ارنالعان شارالارعا توقتالىپ وتسەم، ءبىرىنشى كەزەكتە وتاندىق ماشينا جاساۋدى دامىتۋ ءۇشىن (اۆتوموبيلدەردى، تىكۇشاقتاردى جانە جولاۋشىلار ۆاگونداردى جاساۋ) 2015 - جىلى ۇلتتىق قوردان 35 ميلليارد تەڭگە بولىنەدى، ونىڭ ىشىندە اۆتوموبيلدەردى جاساۋ ءۇشىن 20 ميلليارد تەڭگە، تىكۇشاقتاردى جاساۋ ءۇشىن 10 ميلليارد تەڭگە، جولاۋشىلار ۆاگوندارىن جاساۋ 5 ميلليارد تەڭگە قاراستىرىلدى»، - دەدى م. قۇسايىنوۆ.
اتاپ ايتقاندا، وتاندىق اۆتوموبيل جانە تىكۇشاق وندىرۋشىلەردى قولداۋ ىشكى نارىقتا شەتەلدىك ونىمدەردىڭ يمپورتىن وتاندىق ءوندىرىس ونىمدەرىمەن الماستىرۋدى قامتاماسىز ەتەتىن بولادى.
«جالپى، قابىلدانىپ جاتقان شارالار الەۋەتتى ىشكى جانە سىرتقى تۇتىنۋشىلارعا ءتيىمدى قارجىلىق جاعدايىندا وتاندىق ماشيناجاساۋ ءونىمىن الۋعا مۇمكىندىك بەرەدى»، - دەپ ءتۇيدى ول.
اۆتور: رۋسلان عابباسوۆ
