14:11, 09 - قازان 2014 | GMT +5
الماتىدا گيمناستيكا جاتتىقتىرۋشىسى 10 جاسار قىزعا قول كوتەرگەن - كەسكىن
الماتى. قازاقپارات - عالامتوردا گيمناستيكا جاتتىقتىرۋشىسى 10 جاستاعى قىز بالاعا قول جۇمساعانى تۇسىرىلگەن بەينەجازبا ينتەرنەت پايدالانۋشىلارى اراسىندا قىزۋ تالقىلانۋدا.
وقيعا الماتىداعى و. جارىلقاپوۆ اتىنداعى سپورت كەشەنىندە جاسى كىشى قىزداردىڭ كوركەم گيمناستيكادان جاتتىعۋ توبىندا ورىن العان.
بەينەباياندا باپكەردىڭ سپورتشى قىزعا شۇيلىگىپ، بىرنەشە رەت شاپالاقپەن ۇرعانى كورىنىپ تۇر.
جانجالعا كۋا بولعان قىزدىڭ ايتۋىنشا، اشۋشاڭ جاتتىقتىرۋشى ودان بەينەجازبانى ءوشىرۋىن تالاپ ەتكەن.
قالالىق ءى ءى د باسپا ءسوز قىزمەتىنىڭ جەتەكشىسى سالتانات ازىربەكتىڭ ايتۋىنشا، اتالعان دەرەككە بايلانىستى تەكسەرۋ جۇرگىزىلۋدە.
«قازىر بۇل بەينەتاسپا انىقتاۋ ءبولىمىنىڭ قولىندا. ولار ماسەلەنىڭ ءمان-جايىن انىقتاۋدا. بۇل ءىس بويىنشا قوسىمشا اقپارات بولسا ب ا ق وكىلدەرىنە حابارلايمىز»، - دەدى س. ازىربەك.
ال، سپورت كەشەنى باسشىلىعى قانداي دا ءبىر تۇسىنىكتەمە بەرۋدەن باس تارتتى.
اۆتور: گۇلميرا عوسمانالي
