ەڭبەگىنىڭ ناتيجەسىندە 108 مىڭ ادامنىڭ يمان كەلتىرۋىنە سەبەپكەر بولعان
وسى ەڭبەگىنىڭ ناتيجەسى رەتىندە 108 مىڭ ادامنىڭ مۇسىلمان بولعاندىعىن ايتۋعا بولادى.
قازىرگى كەزدە شەيح دىنمۇحاممەد «اللا ءۋالي» ۇلكەن مەشىتى مەن دىنگە بەتبۇرۋشىلاردى وقىتاتىن «ايشا ءتالىم ءال- قۇران» مەدرەسەسىن باسقارىپ وتىر.
ول ۇنەمى بەزەندىرىلگەن تاياق ۇستاپ جۇرەدى. قاريانىڭ القىزىل ءتۇستى كۋفياسى ونىڭ دىنگە بەرىكتىگىن اڭعارتىپ تۇرعانداي.
قاريا: «مەن بۇكىل الەمنىڭ مۇسىلمان بولعانىن قالار ەدىم»، - دەگەن وزەكجاردى تىلەگىن ءبىلدىردى. تاعى ءبىر سوزىندە: «مەن يسلامدى ءاردايىم جاقسى كورۋمەن كەلدىم. قۇران كارىمدى وقىعاندا تۇسىنگەنىم، 360 قۇدايدىڭ بولۋى مۇمكىن ەمەس» - دەيدى.
العاش رەت قاسيەتتى قۇراندى جاسىرىن وقىپ ءجۇردى. ويتكەنى، ول ءوزىن وزگە مۇسىلماندار كورگەندە تۇسىنبەي قالۋىنان قورىقتى.
اناسى وزگە دىنگە اۋەستىك تانىتىپ جۇرگەن بالاسى ءۇشىن الاڭداعان بولاتىن. ءسويتىپ، ەگەر بالاسىن ۇيلەنۋگە كوندىرسە، وندا كوڭىلى باسقا جاققا بۇرىلادى دەپ ۇمىتتەندى. سودان 15 جاسقا تولار- تولماس توي جاساپ، قاريا ەرتەرەك وتاۋ قۇرادى. ومىرىندە ءتورت قىز، سەگىز ۇل كورەدى.
ءبىراق، بۇل جاعداي وعان يسلامدى وقىپ ۇيرەنۋگە كەدەرگى كەلتىرگەن جوق. ول ساين مۋحاممەد اتتى ۇستاز تاپتى. ۇستازى وعان قاسيەتتى قۇراندى، پايعامبارىمىز مۇحاممەدتىڭ (س. ا. ۋ. ) حاديستەرىن وقۋدى ۇيرەتتى. باقىتىنا وراي، قاريانىڭ اتاسى دا يسلام ءدىنىنىڭ جاقتاۋشىسى بولعان ەكەن. ەكەۋى دىندە تاباندىلىق تانىتىپ، وسى جولدا ءبىر- بىرىنە كومەكتەسۋدى ۇيعارادى. ءبىر وكىنىشتىسى، شەيح بۇرىندارى ءسوزبايلاسىپ قويعاندىقتان قىزىن مۇسىلمان ەمەس ۇندىگە بەرۋگە ءماجبۇر بولادى.
دىنگە كەلگەننەن شەيح دىنمۇحاممەد ادامداردى دىنگە شاقىرۋدى ءوزىنىڭ باستى ماقساتى ەتىپ الدى. اۋەلى ول بۇل يگى ءىستى الىسقا بارماي-اق ءوزىنىڭ اۋلاسىنان باستادى. الدىمەن جانۇياسىنا ءدىن ۇيرەتتى. كەيىننەن بۇل ميسسياسىنىڭ اۋقىمىن كەڭەيتە ءتۇستى. ەشكىمدى كۇشتەپ تارتقان، تەك كوركەم تۇردە ءدىندى دۇرىس تۇسىندىرە ءبىلدى.
باي، بەدەلدى ادامدارمەن كەزدەسە باستادى. بۇل ونىڭ نەگىزگى ماقساتىنىڭ ناتيجەلى بولۋىنا اسەر ەتتى. پاكىستاننىڭ بۇرىنعى ءمينيسترى، قازىرگى كەزدە «ماتلى» قانت شىعاراتىن كومپانيانىڭ باسشىسى سيكاندار حايات وعان وسى ىسىنە ءبىر كومەگى تيەر دەگەن نيەتپەن قوماقتى قارجى بەرگىسى كەلەدى.
ءبىراق، شەيح ودان باس تارتادى. ونىڭ ورنىنا جاڭادان دىنگە بەتبۇرۋشىلار اراسىندا جۇمىسسىز جۇرگەندەر بار ەكەندىگىن ايتىپ، سولارعا جۇمىس تاۋىپ بەرۋىن وتىنەدى. حايات مىرزا مەن ونىڭ قىزىنىڭ كوپتەگەن كومەكتەرى تيگەنىن ايتا كەتۋ كەرەك.
شەيحتىڭ ءوزىنىڭ ايتۋى بويىنشا، ونىڭ بۇل ارەكەتىن الىس- جاقىنداعىلار جاقسى قابىلداپ، ءتىپتى ءتۇرلى ءدىن مەن اعىمداردىڭ وكىلدەرىنىڭ ءوزى يسلامدى قابىلداپ، ءدىندى تەرەڭىرەك ءتۇسىنۋ ءۇشىن الدىنا كەلەتىن كورىنەدى. ونىڭ تۇراتىن ءۇيىنىڭ جانىندا كىشىگىرىم مەشىت سالىنعان. وندا ول بالالاردى قۇران وقۋعا ۇيرەتەدى. ساۋات اشۋشىلاردىڭ اراسىندا دەنى قىز بالالار ەكەن.
جاڭادان دىنگە بەتبۇرۋشىلارمەن جۇمىس جاساۋ قيىن ەكەنىن شەيح جاقسى تۇسىنەدى. ولاردىڭ جاڭا ومىرمەن بەتپە- بەت كەلۋىنىڭ وزىندىك قيىندىقتارعا تولى ەكەنىن دە بىلەدى. العاشقى 40 كۇندىك دارىسىندە ولاردىڭ ومىرلەرىن جەڭىل ەتىپ كورسەتكىسى كەلەدى. «العاشقى كەزدەرى تەك پارىزداردى عانا وتەسە جەتكىلىكتى» - دەيدى ول تەك مىندەتتى نارسەلەردى مەڭزەپ. ەگەر وندايلارعا بىردەن كۇنىنە بەس رەت ناماز وقۋ كەرەك ەكەندىگىن مىندەتتەسەڭ، وندا ولاردىڭ تۇرلەرى بۇزىلىپ، قاشىپ كەتۋگە دايىن.
ول ادامدارعا قالاي اسەر ەتەتىندىگىن اشىپ ايتقان جوق. ءبىراق، ۇنەمى ولارعا: «مەن دە كەزىندە ءۇندى بولعانمىن. ەگەر مۇسىلمان بولماساڭدار، وندا قيىن ەسەپ كۇنى مەن توزاق وتى كۇتىپ تۇر» دەيدى ەكەن.
جاڭادان دىنگە بەت بۇرعانداردى باسقا اۋداندارعا ءبىرشاما ۋاقىتقا جىبەرىپ وتىرادى. ياعني، مۇسىلماندار كوپ شوعىرلانعان اۋداندارعا. بۇل ولاردىڭ ۇندىلەردىڭ كەيبىر قىلىقتارىنان ارىلىپ، ءدىن جايلى تۇسىنىگىن تەرەڭدەتە ءتۇسۋ ءۇشىن قاجەت ەكەنىن جەتكىزەدى شەيح.
ءتىپتى، ۇندىلەر ونى قىزىمەن بىرگە ۇستاپ اكەتىپ، ادامداردى يسلامعا شاقىرۋ ءىسىن دوعارۋىن تالاپ ەتەدى. «ولار كەدەي ۇندىلەر مۇسىلمان بولىپ، كەيىن وزدەرىنە قارسى شىعۋىنان قورقادى. سوندىقتان دا، وسىلاي جاسايدى» - دەيدى قاريا.
108 مىڭعا جۋىق ادامدى تۋرا جولعا سالۋعا سەبەپكەر بولسا دا، ول مۇنى قاناعات تۇتپايدى. ول ءاربىر جەر بەتىندەگى پەندەنىڭ مۇسىلمان بولعانىن قالار ەدى. كەۋدەسىندە جان باردا بۇل ىسپەن ارى قاراي دا اينالىسۋدى توقتاتپاق ەمەس.