بيىل كوللەدجگە تۇسەم دەگەن تالاپكەرلەر ءۇشىن گرانت سانى 107 مىڭعا جەتەدى
«ءبىلىمدى ۇلت» ساپالى ءبىلىم بەرۋ» ۇلتتىق جوباسى اياسىندا كەزەڭ- كەزەڭىمەن تەگىن وقي الادى. «بيىلعى وقۋ جىلىندا العاش رەت الەۋمەتتىك وسال توپ ساناتىنداعى بالالاردىڭ كوللەدجدەرگە ءتۇسۋى ءۇشىن تاعى ءۇش كۆوتا ەنگىزىلدى. كۆوتا كوپبالالى، تولىق ەمەس وتباسىنان، ەرەكشە قاجەتتىلىكتەرى بار بالالاردى تاربيەلەپ وتىرعان وتباسىنان شىققان بالالارعا ارنالعان. بۇرىن مۇنداي مۇمكىندىك جەتىم، اتا- اناسىنىڭ قامقورلىعىنسىز قالعان، ەرەكشە قاجەتتىلىكتەرى بار بالالارعا، سونداي- اق جەڭىلدىكتەر بويىنشا ۇلى وتان سوعىسى قاتىسۋشىلارىنا تەڭەستىرىلگەن تۇلعالارعا قاراستىرىلعان ەدى. اۋىل جاستارى دا كۆوتا بويىنشا مەملەكەتتىك تاپسىرىستى الادى»، - دەدى ق ر ب ع م تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ناسىمجان وسپانوۆا.
سونىمەن قاتار ءبىلىم بەرۋدىڭ اشىقتىعى مەن قولجەتىمدىلىگىن قامتاماسىز ەتۋ ءۇشىن مينيسترلىك مەملەكەتتىك تاپسىرىستاردى «اقشا ستۋدەنتتىڭ سوڭىنان جۇرەدى» قاعيداتى بويىنشا ورنالاستىرۋدىڭ جاڭا مەحانيزمىن ازىرلەدى. ياعني بۇعان دەيىن گرانتتاردى كوللەدجدەر اراسىندا ءبىلىم بولىمدەرى ورنالاستىرعان بولسا، ەندى كوللەدجدەر اراسىنداعى مەملەكەتتىك تاپسىرىس تالاپكەرلەردىڭ تاڭداۋى بويىنشا بولىنەدى.
