اقتاۋدا 102 جاستاعى تىل ارداگەرى راۋىش يمانبايەۆا مەرەكەنى اتاپ ءوتتى - فوتو
ونى 4 بالاسى، 40 نەمەرەسى، 28 شوبەرەسى جانە 10 شوپشەگى قۇتتىقتاۋدا، دەپ حابارلايدى «قازاقپارات» ح ا ا ءتىلشىسى. «ۇلى وتان سوعىسىنداعى جەڭىستى كورگەنىم ءۇشىن اللاعا جانە تاعدىرىما العىس ايتامىن. بۇل جەڭىس بىزگە وڭايلىقپەن كەلگەن جوق. مەن نەمەرەلەرىمدى، شوبەرەلەرىمدى، شوپشەكتەرىمدى باعىپ- قاقتىم، قازىر مەيىرىم- ماحابباتقا بولەنىپ ءومىر سۇرۋدەمىن. قازىرگە دەيىن وتباسىما پايدام تيۋدە. قازىر نەمەرەمنىڭ ۇيىندە تۇرىپ جاتىرمىن، بارلىعى جۇمىس ىستەيدى، ال مەن شوبەرەمدى وسىرۋدەمىن»، - دەيدى راۋىش اپاي.
ول 1915 -جىلى 1 -قاڭتار كۇنى اتىراۋ وبلىسى، تەڭىز اۋدانى، بوتاقان اۋىلىندا قابۋ مەن ۇمسىنايدىڭ وتباسىندا دۇنيەگە كەلگەن. وتباسىندا ءتورتىنشى بولىپ ومىرگە كەلگەن. بار-جوعى 3 سىنىپتىق ءبىلىم العان. 20 جاسىندا شياپقا تۇرمىسقا شىعادى. بارلىعى 7 قۇرساق كوتەرەدى. سوعىس باستالعاندا جولداسىنا برون بەرەدى، ول قايىقتاعى بالىقشىلاردىڭ بريگاديرى رەتىندە جۇمىس جاساپ، مايداندى ازىقپەن قامتاماسىز ەتكەن. راۋىشتىڭ ءوزى بالالارىنا قاراپ، كۇندىز جولداسىنا كومەكتەسىپ بارلىعىنا ۇلگەرگەن.
ال تۇندە اۋىلداعى بارلىق ايەلدەر سەكىلدى مايدانداعىلار ءۇشىن شۇلىق، قولعاپ جانە مويىنوراۋىشتار توقىعان. سوعىس كەزىندە راۋىش اپا جايلى « قىزىل جۇلدىز» گازەتىندە ماقالا جاريالانعان. ونىڭ كوشىرمەسى الماتى قالاسىنداعى مۇراعاتتا ساقتالعان. ول جولداسىمەن 34 جىل وتاسىپ، 1969 -جىلى ۇزاققا سوزىلعان اۋىر ناۋقاستان وتاعاسى كوز جۇمادى. قازىر ونىڭ 7 بالاسىنىڭ تورتەۋى ءتىرى. ونىڭ ورتانشى ۇلى م ا ي- دا قىزمەت جاساپ، 45 جاسىندا زەينەتكە شىقتى. 2002 -جىلى تىل ارداگەرى اقتاۋ قالاسىنداعى نەمەرەسىنە كوشىپ كەلەدى. راۋىش اپا دەنساۋلىعىنا كۇتىممەن قاراپ، ازىق- تۇلىك ساتىپ الاردا مۇقيات قاراپ الادى ەكەن.
سوندىقتان، ونىڭ دەنساۋلىعى سىر بەرە قويماعان. «مەن بالىق جانە ءسۇت ونىمدەرىن، اسىرەسە شۇباتتى جاقسى كورەمىن. بۇل - وتە پايدالى. ءبىز سوعىس جىلدارى بالىقتى اۋمەن اۋلادىق. اشتىق كەزىندە بالىقتان باسقا تىسكە باسار ەشتەڭە بولمادى. ءبىراق، مەن بالىقتى قازىرگە دەيىن جاقسى كورەمىن. جاستارعا مىقتى دەنساۋلىق پەن ايەل باقىتىن تىلەيمىن. بارلىق ايەلدەر قاۋىمىن مەرەكەمەن قۇتتىقتايمىن! باردى باعالاڭىزدار، سۇيىڭىزدەر، جانىڭىزداعى ادامداردى قادىرلەڭىزدەر. ءبىراق ادامدار بۇل شىندىقتى كەش ءتۇسىنىپ جاتادى»، - دەپ تىلەك ايتتى ر. يمانبايەۆا.
