رەسەيدە 102 جاستاعى فۋتبول جانكۇيەرىن توناپ كەتتى

استانا. قازاقپارات - ماسكەۋدىڭ «سپارتاك» فۋتبول كومانداسىنىڭ ەڭ كارى جانكۇيەرى، سوعىس ارداگەرى 102 جاستاعى وتتو فيشەردى بەلگىسىز بىرەۋلەر توناپ، ۇيىنەن 730 مىڭ ءرۋبلىن الىپ كەتكەن.

بۇل تۋرالى sport.rbc.ru حابارلادى.

«سپارتاكتىڭ» رەسمي فان- كلۋبى اتالعان مالىمەتتى راستاپ وتىر. كلۋب ديرەكتورى ولەگ سەمەنوۆتىڭ ايتۋىنشا، فيشەردىڭ كوپەيسكىدەگى ءۇيى تونالعان.

«قىلمىسكەرلەر ارداگەردىڭ ۇيىنە الەۋمەتتىك جۇمىسشى رەتىندە كىرگەن. قاريانى «جەڭىستىڭ 70 جىلدىعىنا بايلانىستى مەملەكەت 800 رۋبلدەن بەرۋدە، سونى اكەلدىك»، دەپ الداعان. كەيىن ءۇي يەسىنە 5000 رۋبل بەرگەن. وتتو فيشەر قالعان اقشانى قايتارىپ بەرگەندە قىلمىسكەرلەر سۋ سۇراعان. سول كەزدە ارداگەر اس ۇيگە سۋ اكەلۋگە كەتكەندە، ولار ارام ويلارىن جۇزەگە اسىرىپ ۇلگەرگەن»، دەيدى ولەگ سەمەنوۆ.

تاياۋدا عانا وتتو فيشەر ءوزىنىڭ سۇيىكتى كومانداسىنىڭ ويىنىنا قاتىسۋ ءۇشىن ماسكەۋگە كەلىپ كەتكەن ەدى. «سپارتاك» پەن «دينامو» (ماسكەۋ) اراسىنداعى ماتچتىڭ سالتاناتتى اشىلۋىنا قاتىسقان ول الاڭعا شىعىپ، دوپتى ويىنعا قوستى. سول ءۇشىن 102 جاستاعى قاريا چەليابينسكىدەن ماسكەۋگە پويىزدىڭ پلاتسكارت ۆاگونىمەن 35 ساعات ءجۇرىپ كەلگەنىن ايتا كەتەيىك. ال ونىڭ جول شىعىنىن كلۋب ءوز موينىنا الىپ، 3848 رۋبل تولەگەن. سونداي-اق، «سپارتاك» ءوز جانكۇيەرىنىڭ تونالعان قارجىسىن دا وتەپ بەرمەك. ول ءۇشىن الداعى ويىنداردا بيلەتتەن تۇسكەن تابىستىڭ ءبىر بولىگىن فيشەردىڭ اتىنا اۋدارۋدى جوسپارلاپ وتىر. ودان بولەك، رەسمي فان- كلۋب ارنايى ەسەپشوت اشىپ، قايىرىمدى جانداردان كومەك سۇراۋدا.

ەلامان قوڭىر.

اقپارات كوزى: «ەگەمەن قازاقستان»