دۇنيەجۇزىلىك قايىرىمدىلىق رەيتينگىسىندە قازاقستان 101- ورىندا تۇر
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا پرەزيدەنت جانىنداعى وتباسى جانە ايەلدەر ىستەرى جونىندەگى ۇلتتىق كوميسسيانىڭ مۇشەسى، «باۋىرجان» قوعامدىق قايىرىمدىلىق قورىنىڭ ديرەكتورى جۇلدىز وماربەكوۆا ءمالىم ەتتى.
«وزدەرىڭىز بىلەسىزدەر، «باۋىرجان» قايىرىمدىلىق قورى توعىز جىلدان بەرى «التىن جۇرەك» جوباسىن جۇزەگە اسىرىپ كەلەدى. بۇل - قايىرىمدىلىق سالاسىندا بەرىلەتىن قازاقستانداعى جالعىز سىيلىق. ءبىزدىڭ ەسەبىمىز بويىنشا، بيىل قازاقستاندا 12 ميلليارد تەڭگە قايىرىمدىلىققا جۇمسالعان ەكەن»، - دەيدى ول.
ج. وماربەكوۆا سونداي-اق، قازاقستان قايىرىمدىلىق رەيتينگىسى بويىنشا الەمدەگى ءوز پوزيتسياسىن جاقسارتقانىن، بۇل ءوز كەزەگىندە، قوعام دامۋىنىڭ باستى كورسەتكىشى ەكەنىن اتاپ ءوتتى.
«دۇنيەجۇزىلىك قايىرىمدىلىق رەيتينگىسىندە قازاقستان 121- ورىننان 101- ورىنعا كوتەرىلدى. بۇل ءبىزدىڭ قوعامىمىزدىڭ دامىپ كەلە جاتقانىن كورسەتەدى. قانشا دامىعان ەل بولسا دا، ول مەملەكەتتە كومەككە مۇقتاج جاندار تابىلادى»، - دەدى ءسوزىن تۇيىندەگەن ول.
اۆتور: كەنجەكەي توقتامۇرات قىزى
