وسكەمەندىك اسپازدار ۇزىندىعى 100 مەتردەن اساتىن سالات جاساپ، گيننەستىڭ رەكوردتار كىتابىنا ەندى
30- تامىز وسكەمەندىكتەر ءۇشىن تەك كونستيتۋتسيا كۇنى عانا ەمەس. بۇگىن ولار قالا كۇنىن دە اتاپ وتۋدە. تاڭەرتەڭنەن ورتالىق الاڭدا ءتۇرلى مەرەكەلىك ءىس-شارالار وتكىزىلىپ جاتىر.
اتاپ ايتقاندا، قاربىز فەستيۆالى، بال جارمەڭكەسى، «شىعىس ءدامى» گاسترونوميالىق فەستيۆالى ۇيىمداستىرىلدى. قولونەرشىلەر ءوز ونىمدەرىن ورتاعا شىعارىپ، ساۋدا-ساتتىق قىزا ءتۇستى.
ەرەكشە ايتا كەتەرلىگى، مەرەكەگە وراي 15 اسپاز دالادا ەڭ ۇزىن «كاپرەزە» سالاتىن دايىندادى. 100 مەتر 15 سانتيمەترلىك وسىنداي سالات بۇرىن-سوڭدى ەش جەردە جاسالماعان.
«سالاتتىڭ ۇزىندىعى 100 مەترگە جەتەدى دەپ ويلاعان ەدىك، ءبىراق ودان اسىپ كەتتى. وسىلايشا، گيننەستىڭ رەكوردتار كىتابىنا ەنگىزىلدى. ەندى وسكەمەن وسىنداي الەمدىك رەكورد ورناتقان قالا رەتىندە تاريحتا قالادى»، - دەيدى گيننەس رەكوردتارىنىڭ قازاقستان وڭىرلىك كىتابىنىڭ رەسمي وكىلى قۋاندىق قۇدايبەرگەنوۆ.
قازىرگى ۋاقىتتا ورتالىق الاڭدا ەسترادا جۇلدىزدارىنىڭ قاتىسۋىمەن كونسەرت جالعاسىپ جاتىر. ءىس-شارالار لەگى ساعات 22.00 دە وتشاشۋمەن تۇيىندەلمەك.
