تالدىقورعاندا 100 گە جۋىق وتباسىنا پاتەر كىلتتەرى تابىستالدى- فوتو

تالدىقورعان. قازاقپارات - استانا كۇنىنە وراي، تالدىقورعاندا 98 پاتەرلى ءۇي پايدالانۋعا بەرىلدى، دەپ حابارلايدى قازاقپارات جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.

استانانىڭ 25 جىلدىق مەرەيتويى قاراساڭىندا تالدىقورعان قالاسىنداعى «بىرلىك» شاعىناۋدانىندا «نۇرلى جەر» باعدارلاماسى بويىنشا سالىنعان 5، 7، 9 قاباتتى تۇرعىن ءۇي پايدالانۋعا بەرىلدى.

«تالدىقورعان قالاسىندا 15 مىڭ ادام ءۇي كەزەگىندە تۇر. ەندىگى ءبىزدىڭ مىندەتىمىز - كەزەكتە تۇرعانداردىڭ سانىن ەكى ەسە قىسقارتۋ. ول ءۇشىن جىلىنا كەمىندە 1500-2000 شارشى مەتر ءۇي بەرۋىمىز كەرەك. وسىعان دەيىن كەزەككە بايلانىستى تۇسىنبەۋىشىلىك، زاڭسىزدىقتار بولدى. تۇرعىندار كەزەگىن تسيفرلىق جۇيەگە كوشىردىك. ەندى كەز كەلگەن ادام ءوز كەزەگىن ۇيىندە وتىرىپ-اق باقىلاي الادى. قۋانىشتارىڭىز ۇزاققا سوزىلسىن. وسى ۇيدە ءونىپ-ءوسىپ، باقىتتى عۇمىر كەشىڭىزدەر!» - دەدى وبلىس اكىمى بەيبىت يسابايەۆ كىلت تابىستاۋ سالتاناتىندا.

بۇل ءۇيدىڭ قۇرىلىسى 2020 -جىلى باستالعان بولاتىن. 98 پاتەردىڭ 42 سى - 1 بولمەلى، 28 ى 2 بولمەلى، 28 ى ءۇش بولمەلى پاتەر.

ايتا كەتسەك، تالدىقورعان قالاسىندا جىل باسىنان بەرى 280 ادام باسپانالى بولدى. ەندى جىل سوڭىنا دەيىن تاعى 1700 ادام ءۇي الادى. ناتيجەسىندە 51 ءۇي پايدانۋعا بەرىلەدى. ولاردىڭ باسىم بولىگى كوپبالالى وتباسىلار، اتا-انا قامقورلىعىنسىز قالعاندار، ارداگەرلەر مەن I ،Ⅱ توپ مۇگەدەكتەرى.