ەرتىس ورمانىندا 100 گەكتار اۋماقتى شارپىعان ءورت ءسوندىرىلدى

پاۆلودار. قازاقپارات - پاۆلودار وبلىسىندا ورمان ءورتى ءسوندىرىلدى، دەپ حابارلايدى قازاقپارات. وبلىستىق توتەنشە جاعدايلار دەپارتامەنتىنىڭ حابارلاۋىنشا، وتتىڭ تۇتانۋىنا ورمانعا جاي ءتۇسۋى سەبەپ بولعان.

«ءورت شارباقتى اۋدانىنىڭ گالكين اۋىلدىق وكرۋگىندە، قۇلات اۋىلىنان 10 شاقىرىم جەردە باستالدى. «ەرتىس ورمانى» تابيعي رەزەرۆاتىنىڭ اۋماعىندا قۇرعاق ءشوپ، قاراعاي مەن قاراعاش جانعان. ءورت بۇگىن ساعات 10.55 كەزىندە تولىق ءسوندىرىلدى. ءتىلسىز جاۋمەن كۇرەسكە 50 ادام، 20-دان استام تەحنيكا، سونىڭ ىشىندە مي-2 تىكۇشاعى جۇمىلدىرىلدى» دەلىنگەن حابارلامادا.

ءورت اۋماعى - 100 گەكتارعا جۋىقتايدى. وقيعادان ەشكىم زارداپ شەككەن جوق.

ەسكە سالا كەتەيىك، كەشە پاۆلودار وبلىسىنداعى «ەرتىس ورمانى» تابيعي رەزەرۆاتىندا ورمان ورتەنىپ جاتقانىن حابارلاعان بولاتىنبىز.