حالىقارالىق «قازاقپارات» اگەنتتىگى تۇركيانىڭ «انادولى» اقپارات اگەنتتىگىن 100 جىلدىق مەرەيتويىمەن قۇتتىقتايدى
تۇركيادا ۇلتتىق اقپاراتتىق اگەنتتىكتى قۇرۋ يدەياسى 1920-جىلدىڭ 31- ناۋرىزىندا مۇستافا كەمال اتاتۇرىكتىڭ گەيۆە قالاسىنداعى تەمىرجول ستانساسىندا ءجۇنىس نادي مەن حاليدە ەديپ اتتى ەكى جۋرناليستپەن كەزدەسۋى كەزىندە تۋعان ەدى.
بولجامدى نۇسقالاردىڭ ىشىندە اگەنتتىككە «تۇرىك»، «انكارا» نەمەسە «انادولى» دەپ ات قويۋ جوسپارلانعان.
كوپ وتپەي «انادولى» اقپارات اگەنتتىگى 6- ساۋىردە رەسمي تۇردە اشىلىپ، جۇمىسىن باستاپ كەتتى.
وسىدان تۋرا 100 جىل بۇرىن تۇركيا حالقىنىڭ باسىنان مەملەكەت بولىپ قايتا تۇلەۋىنىڭ شەشۋشى كەزەڭدەرى ءوتىپ جاتقان ەدى. الەمدەگى الپاۋىت مەملەكەتتەردىڭ ءبىرىنشى دۇنيەجۇزىلىك سوعىسىنان كەيىن دە تۇركيا جەرىندە قيان-كەسكى ۇرىس، تاۋەلسىزدىك ءۇشىن تارتىس بولىپ جاتتى.
تۇرىك حالقىنىڭ باسىنان وتكەرگەن قيىن كەزەڭى تاريح ساحناسىنا مۇستافا كەمال اتاتۇرىكتى الىپ كەلدى.
انتانتا دەرجاۆالارىنىڭ قىسىمى سول تۇستا مەملەكەت بولىپ قايتا تۇلەۋ ءۇشىن تۇرىك حالقىنان بىرلىك پەن كۇشتى تالاپ ەتكەن ەدى. «انادولى» تۇرىك ۇلى ۇلتتىق كەڭەسى قابىلداعان العاشقى زاڭداردان باستاپ تۇرىك رەسپۋبليكاسىنىڭ قۇرىلۋىنىڭ ءار بەلەسىنەن اقپارات بەرىپ، تۇرىك حالقىنىڭ ۇلت-ازاتتىق كۇرەسىنىڭ ءاربىر كەزەڭىنىڭ كۋاسى بولدى.
1925-جىلى اقپارات اگەنتتىگى اتاتۇرىكتىڭ بۇيرىعىمەن «انادولى» تۇرىك اگەنتتىگى كورپوراتسياسىنا اينالدى. اگەنتتىككە تاۋەلسىز مارتەبە بەرىلدى. ول تۇستا مۇنداي مارتەبەسى بار اقپاراتتىق ۇيىم باتىس ەلدەرىنىڭ وزىندە دە جوق ەدى.
«انادولىنىڭ» قازىرگى ۋاقىتتا الەمنىڭ 30 ەلىندە مەنشىكتى تىلشىلەر قوسىنى بار. اگەنتتىكتىڭ جاڭالىقتارى تۇرىك، البان، اعىلشىن، اراب، بوسنيا، كۇرد، ماكەدون، پارسى، ورىس جانە فرانسۋز تىلدەرىندە شىعىپ تۇرادى.
اقپاراتتىق اگەنتتىك Agence France-Presse (فرانسيا)، Getty Images (ا ق ش)، Associated Press (ا ق ش)، يتار-تاسس (رەسەي)، Deutsche Presse-Agentur (گەرمانيا)، EFE (يسپانيا)، يسلام رەسپۋبليكاسىنىڭ اقپاراتتىق اگەنتتىگى (يران)، شينحۋا (قىتاي)، Kyodo News (جاپونيا)، Bernama (مالايزيا) سەكىلدى اقپارات اگەنتتىگىمەن سەرىكتەسە جۇمىس اتقارادى.
ال «قازاقپارات» حالىقارالىق اقپارات اگەنتتىگى مەن «انادولى» اگەنتتىگى اراسىندا ءوزارا ىنتىماقتاستىق تۋرالى كەلىسىمگە ىستانبۇلدا 2018-جىلدىڭ 10- ساۋىرىندە قول قويىلعان ەدى.
اگەنتتىكتىڭ شتاب-پاتەرى انكارادا ورنالاسقان. «قازاقپارات» ۇجىمى «انادولىنى» عاسىرلىق تويىمەن قۇتتىقتاي وتىرىپ، تۇركيالىق اقپارات اگەنتتىگىنىڭ ەڭبەگىنىڭ جەمىستى بولۋىن تىلەيدى. قازىر الەم كوروناۆيرۋس ينفەكتسياسى تۋىنداتقان پاندەميا كەزەڭىن باسىنان وتكەرىپ جاتىر.
ىندەت قازاقستانمەن قاتار ءتۇبى تۇركى - تۇركيا مەملەكەتىن دە شارپىدى. كوروناۆيرۋسكە قارسى كۇرەسپەن بىرگە قازىر الەم مەملەكەتتەرى دۇنيەنى دۇرلىكتىرگەن جالعان اقپاراتپەن كۇندەلىكتى مايدان جۇرگىزۋدە.
«انادولى» اقپارات اگەنتتىگىنىڭ وسىنداي قىسىلتاياڭ شاقتا اۋديتورياعا شىنايى ءارى شۇعىل اقپاراتتى جەتكىزىپ، حالىقتى ۋاقتىلى قۇلاقتاندىرىپ وتىرعانىن وقىپ، كورىپ وتىرمىز. ەندەشە تۇركيالىق اگەنتتىكتىڭ كەيىنگى جۇمىسىنا دا ساتتىلىك، قىزمەتىنە تابىس تىلەگىمىز كەلەدى. جاعىمدى جاڭالىقتاردىڭ جارشىسى بولىپ جۇرە بەرىڭىزدەر!
