جىل سوڭىنا دەيىن ەلوردادا 100 جاڭا ەلەكتر اۆتوبۋسى جۇرەتىن بولادى
«سىزدەردىڭ قىزمەتتەرىڭىز وتە جاۋاپكەرشىلىكتى تالاپ ەتەدى. زەينەتكەرلەر، ستۋدەنتتەر، بالالار، ەلوردا تۇرعىندارى مەن قوناقتارى كۇن سايىن قوعامدىق كولىكتى پايدالانادى. جولاۋشىلاردىڭ قاۋىپسىزدىگى مەن جايلىلىعى تۋرالى ويلانۋ كەرەك. جولاۋشىلار كولىگىنىڭ تۇراقتى جۇمىسى - بۇل حالىقتىڭ ءومىر ءسۇرۋ ساپاسىنىڭ كورسەتكىشى. جولاۋشىلار مەن جۇرگىزۋشىلەردىڭ وزدەرىن جايلى سەزىنۋلەرى ءۇشىن اۆتوبۋس پاركى جىل سايىن جاڭارتىلىپ وتىرادى، مىسالى، قالانىڭ جىلجىمالى قۇرامى %70 جاڭارتىلدى، ال ماماندار اۆتوبۋستاردى ۋاقتىلى جوندەۋدە»، - دەدى ا. كولگىنوۆ.
ەلوردادا جولاۋشىلار كولىگى سالاسىندا 3 مىڭنان استام ادام جۇمىس ىستەيدى. كۇن سايىن 900 اۆتوبۋس جولعا شىعادى، 1700 ادام جۇرگىزۋشى بولىپ ەڭبەك ەتەدى. سوڭعى 5 جىلدا 700 دەن استام اۆتوبۋس ساتىپ الىندى، ولاردا ەرەكشە قاجەتتىلىكتەرى بار ادامداردى تاسىمالداۋعا ارنالعان پاندۋستارمەن جابدىقتالعان جانە زاماناۋي بەينەباقىلاۋ جۇيەلەرىمەن قامتىلعان. كوشەدە ىڭعايلى قوزعالىس ءۇشىن اكىمدىك كوشەلەردى جوندەۋ جۇمىستارىن جۇرگىزۋدە.
«قالالىق اكسەلەراتور اياسىندا قۇرىلعان جۇمىس توبى قوعامدىق كولىكتى جاقسارتىپ، جەتىلدىرۋمەن اينالىسادى. ءبىز جاسىل ەكونوميكاعا كوشۋدەمىز. جىل سايىن قالا تۇرعىندارىنىڭ سانى وسۋدە، اۆتوكولىكتەر سانى دا كوبەيىپ وتىر. قورشاعان ورتاعا تەرىس ىقپالدى ازايتۋ كەرەك. جىل سوڭىنا دەيىن ءبىز 100 ەلەكترواۆتوبۋس ساتىپ الامىز. بۇل تەك ۇلكەن شارۋانىڭ باستاماسى عانا»، - دەپ اتاپ ءوتتى ا. كولگىنوۆ.
ەلوردا اكىمى قوعامدىق كولىكتىڭ باسىمدىلىعىن ارتتىرۋدىڭ ماڭىزدىلىعىن اتاپ ءوتتى. وسىلايشا، جەكە Bus lane جولاقتارىنىڭ ەنگىزىلۋىنە بايلانىستى اۆتوبۋستاردىڭ ءجۇرۋ جىلدامدىعى ارتقانىن اتادى.
«ەگەر ادامدار قوعامدىق كولىكتى ەرىكتى تۇردە پايدالانسا، بۇل قالانىڭ دامۋىنىڭ كورسەتكىشى بولادى. قازىرگى كەزدە Bus lane جولاعىنىڭ ارقاسىندا اۆتوكولىككە قاراعاندا اۆتوبۋسپەن قالاعان جەرگە تەز جەتۋگە بولادى. بۇدان بولەك، بيلەتتەردى بەرۋدىڭ ەلەكتروندىق جۇيەسىن ەنگىزۋ اۆتوتۇراقتاردىڭ تابىسىن 40 پايىزعا ارتتىردى. سونىمەن بىرگە، ەگەر وتكەن جىلى قىزمەت كورسەتۋ ساپاسىنا 13 مىڭ شاعىم تۇسكەن بولسا، وسى جىلى 21 مىڭنان استام شاعىم ءتۇستى (%60 عا وسكەن). ءبىز بۇل كورسەتكىشتى تۇزەتۋىمىز كەرەك. ءبىز قوعامدىق كولىكتىڭ بارلىق قاتىسۋشىلارىنا جايلى جاعداي جاساۋ ءۇشىن جۇمىس جاسايمىز، باستىسى جولاۋشىلاردىڭ قاۋىپسىزدىگىن قامتاماسىز ەتۋ»، - دەپ باسىپ ايتتى قالا باسشىسى.
قالا اكىمى كولىك قىزمەتكەرلەرىنە العىس حاتتار تابىستاپ، ىستەرىنە ساتتىلىك جانە وتباسىلارىنا اماندىق تىلەدى.
«سىزدەردىڭ جۇمىستارىڭىز وڭاي ەمەس. كەز-كەلگەن اۋا-رايىندا: قىستا قاقاعان ايازدا، جازدا كۇن ىستىقتا جۇمىسقا شىعاسىزدار. سىزدەر يگىلىكتى ءىس جاساپ جاتىرسىزدار. اتقارىپ وتىرعان ادال قىزمەتتەرىڭىز، قاجىرلى ەڭبەكتەرىڭىز ءۇشىن العىس ايتامىن»، - دەدى ا. كولگىنوۆ.