مۇناي باررەلى 100 دوللارعا جەتە مە - ساراپشىنىڭ پىكىرى

None
None
استانا. قازاقپارات - ق ر تۇڭعىش پرەزيدەنتى - ەلباسى قورىنىڭ جانىنداعى الەمدىك ەكونوميكا جانە ساياسات ينستيتۋتىنىڭ ساراپشىسى سەرگەي دومنين مۇناي باعاسىنىڭ قىمباتتاۋ ىقتيمالدىعىنا قاتىستى پىكىرىمەن ءبولىستى.

 «قازىر باعالار 2014 -جىلدىڭ كۇزىندەگى مولشەرگە قايتىپ ورالۋدا. وعان يرانعا ەنگىزىلگەن امەريكالىق سانكسيالارمەن اتالمىش ەلدەن جەتكىزىلىمدەرگە شەكتەۋ قويىلۋدان نارىقتا تاپشىلىق تۋىنداۋى مۇمكىن دەگەن ترەيدەرلەردىڭ قاۋپى، سونداي- اق ۆەنەسۋەلاداعى ءوندىرىس پروبلەمالارى سەبەپ بولۋدا»، - دەدى سەرگەي دومنين قازاقپارات تىلشىسىنە.

ونىڭ ايتۋىنشا، وسى قاۋىپتەردىڭ ەسەلەنۋىنە بايلانىستى ەكى- ءۇش اپتا ىشىندە Brent ماركالى مۇنايدىڭ باررەلى 90 دوللارعا دەيىن جەتۋى مۇمكىن.

«قىسقا ارالىقتا مۇنايدىڭ 100 دوللارعا كوتەرىلۋ ىقتيمالدىلىعى وتە از»، - دەدى ول.

سەرگەي دومنين اتاپ وتكەندەي، باعانىڭ كۇرت قىمباتتاۋى مۇناي كارتەلى كوزدەپ وتىرعان نارىقتاعى ۇيلەسىمدى بۇزۋى مۇمكىن. باعا وسىمىنە جاۋاپ رەتىندە وپەك+ كۆوتا ءبولىپ، بالانس قايتا قالپىنا كەلمەك.

«جاقىن جىلدارى مۇنايدىڭ باعاسى كەلەسى فاكتورلارعا بايلانىستى قۇبىلاتىن بولادى. ولار: وپەك+ بەرەتىن شيكىزات كۆوتاسىنىڭ وزگەرۋى، يرانعا قاتىستى سانكسيالىق رەجىم، تاقتاتاس مۇنايى جوبالارىنىڭ شيكىزات دەڭگەيى مەن ا ق ش قورىنىڭ دەڭگەيى»، - دەپ اتاپ ءوتتى سەرگەي دومنين.

ساراپشىنىڭ پىكىرىنشە، ۇزاقمەرزىمدى كەلەشەكتە قارا التىن باعاسىنىڭ ءبىرقالىپتى تومەندەۋى بايقالادى. سەبەبى، ءبىرقاتار ەكونوميكا وندىرىلەتىن وتىننان جاڭعىرتىلاتىن ەنەرگيا كوزدەرىنە كوشىپ كەلەدى.

ايتا كەتسەك، وسى دۇيسەنبىدە لوندوننىڭ ICE Futures بيرجاسىندا Brent ماركالى مۇنايدىڭ باعاسى 81 دوللاردان اسىپ ءتۇستى. مۇنداي باعا 2014 -جىلدىڭ قاراشاسىنان العاش تىركەلدى. كەشەگى ساۋدا- ساتتىقتىڭ ناتيجەسى بويىنشا، مۇناي باعاسى تاعى كوتەرىلدى.

اۋدارما: ايان بەكەن ۇلى

سوڭعى جاڭالىقتار