تەڭىز كەن ورنىن كەڭەيتۋمەن 100 مىڭ ادام اينالىسۋدا
دەپ حابارلايدى قازاقپارات «حابار 24» تەلەارناسىنا سىلتەمە جاساپ.
قۇرىلىس اياقتالعان سوڭ كەن ورنىندا مۇناي ءوندىرۋدىڭ كولەمى 12 ميلليون تونناعا ءوسىپ، جىلىنا 39 ميلليون تونناعا دەيىن ارتاتىنى جوسپارلانعان. بۇگىننىڭ وزىندە جوبانىڭ ەل ەكونوميكاسىنداعى ۇلەس سۇبەلى.
ءوندىرىستى كەڭەيتۋگە كىرىسكەن كەن ورنىندا بۇگىنگى كۇنى ءبىر مەزگىلدە 50 مىڭ ادام جۇمىس ىستەۋدە. ولاردىڭ ۆاحتامەن جۇمىس ىستەيتىنىن ەسكەرسەك، جۇمىسشىلاردىڭ جالپى سانى 100 مىڭعا جەتەدى. جاڭا زاۋىتتىڭ سۇلباسى قۇرىلىس الاڭىندا ەندى عانا كورىنە باستادى. ءبىراق، ونىڭ بىرەگەيلىگى قازىردەن بەلگىلى. ول جالپى سالماعى 53 مىڭ توننا جەكە مودۋلدەردەن تۇرادى. ولاردى كاسپييدەگى زاۋىتقا جەتكىزۋ ءۇشىن تەڭىز ايلاعىن سالۋعا تۋرا كەلدى. ونى سالۋ كەزىندە ۇزىندىعى 71 كيلومەتر جانە تەرەڭدىگى 5 مەترگە جۋىق كانال قازىلدى.
«قارا جانە بالتىق تەڭىزدەرىنەن مودۋلدەر رەسەيدىڭ ىشكى سۋلارى ارقىلى كاسپييگە تۇسەدى. بارجالاردىڭ ەڭ جوعارعى جۇك كوتەرگىشتىگى 2 مىڭ تونناعا جەتەدى. مودۋلدەر الدىمەن پرورۆا پورتىنا، سودان سوڭ تەڭىزگە جەتكىزىلەدى»، - دەيدى ۇكىمەت جانە قوعاممەن بايلانىس جونىندەگى باس مەنەدجەر رزابەك ارتىعالييەۆ.
جوبا اياقتالعاننان كەيىن پورت قازاقستانعا وتەدى جانە كاسپي تەڭىزىندەگى تاعى ءبىر ترانزيتتىك حابقا اينالادى. ول ارقىلى استىقتى دا، مەتالدى دا جونەلتۋگە، قىتايدان جانە ازيا ەلدەرىنەن ەۋروپاعا باعىتتالعان جۇكتەردى تاسىمالداۋعا دا قولايلى بولادى. 4 جىلدان كەيىن مۇندا مۇناي ءوندىرۋ كولەمى قازىرگى 12 ميلليون توننادان 39 ميلليونعا دەيىن وسەدى دەپ كۇتىلۋدە.
