ياساۋي حيكمەتتەرىنىڭ 100-دەن استام قولجازبا نۇسقاسى جاريالانادى
بۇل تۋرالى ايماق باسشىسى جانسەيىت تۇيمەبايەۆ كەزەكتى ەسەپتىك جيىندا مالىمدەدى، دەپ حابارلايدى قازاقپارات ءتىلشىسى.
وبلىس اكىمىنىڭ ايتۋىنشا، بيىل قوجا احمەت ياساۋي مۇراسىنىڭ XVI- عاسىردا كوشىرىلگەن حيكمەتتەرىنىڭ 100-دەن استام قولجازبا نۇسقاسىن جاريالاۋ ارقىلى تۇركى دۇنيەسىنىڭ رۋحاني تۇتاستىعىن قامتاماسىز ەتۋ كوزدەلىپ وتىر.
«اعىمداعى جىلى وبلىستا «قىمىزمۇرىندىق»، قاۋىن fest، «اگرو fest، «اقسۋ- جاباعىلىنىڭ القىزىل قىزعالداعى» ، «تۋعان جەرگە تاعزىم» تاقىرىپتارىندا ءداستۇرلى تۇردە وتەتىن ەرەكشە جوبالار قولعا الىنادى. ولاردىڭ قاتارى شاردارا اۋدانىنىڭ تۋريستىك الەۋەتىن كوتەرۋ ماقساتىنداعى تۋريستىك فورۋم جانە «Safari Shardara»ءىس- شارالارى مەن سارىاعاشتا گولفتەن «Open Saryagash» جارىسىمەن جالعاساتىن بولادى»، - دەدى جانسەيىت قانسەيىت ۇلى.
وبلىس اكىمىنىڭ سوزىنشە، يۋنەسكو- نىڭ «ۇلى جىبەك جولى ەسكەرتكىشتەرى» نوميناتسياسى بويىنشا وڭىردە 8 ەسكەرتكىش بار. ولار - ساۋران، تۇركىستان، سيداق، قاراسپان، جۋانتوبە، كۇلتوبە، وتىرار، ءبورجار ەسكەرتكىشتەرى. «كونە تۇركىستان» تۇجىرىمداماسى 3 كەزەڭدە جۇزەگە اسىرىلاتىن بولادى. ال، ورداباسى تاۋىندا ءۇش بيگە مونۋمەنت ورناتىلسا، «قازىعۇرت تاۋى» جوباسىنىڭ تۇجىرىمداماسى دايىندالۋ ۇستىندە. بۇل ەكى تاۋدا تۋريستىك ينفراقۇرىلىمدار قاراستىرىلىپ، سونداي- اق كيەلى، قاسيەتتى ورىنداردى اياقاستى ەتپەۋ جاقتارى ەسكەرىلىپ وتىر.
ايماق باسشىسى سونداي- اق ەسەپتىك جيىندا وتىرار قالاشىعى مەن ارىستانباب كەسەنەسىن بايلانىستىراتىن ەجەلگى جولدى قايتا جاڭعىرتىپ، ونىڭ بويىندا ۇلتتىق قولونەرشىلەردىڭ شەبەرحانالارى بوي تۇزەيدى دەپ الداعى جوسپارلارمەن ءبولىستى.
اۆتور: اينۇر اقبايەۆا
