قوستانايدا 100 دەن استام مالعا قاۋىپتى ىندەت جۇققان
وبلىس اكىمدىگىندە وتكەن كەزەكتى اپپارات كەڭەسىندە ۆەتەريناريا سالاسىنىڭ ماسەلەلەرى قارالدى. جالپى، وڭىردە 2016 -جىلدان بەرى برۋتسەللەزگە شالدىققان قارا مالدىڭ سانى ازايعان.
«وڭىردە اۋىل شارۋاشىلىعىنداعى جەتىستىكتەردىڭ دەنى قاي ۋاقىتتا دا ەپيزووتيالىق احۋالدىڭ تۇراقتىلىعىنا بايلانىستى. 2015 -جىلى وڭىردەگى ءۇي جانۋارلارلارىنىڭ %0,87 برۋتسەللەز جۇقتىرسا، وتكەن جىلى ونىڭ دەڭگەيى% 0,59 دەيىن تومەندەگەن. اۋليەكول اۋدانىندا سوڭعى ەكى جىل ىشىندە احۋالى ناشار 12 مەكەن ساۋىقتىرىلسا، وتكەن جىلى اتالمىش ايماقتاردا ءقاۋىپتى ىندەتتى جۇقتىرۋ دەڭگەيى 2,5 ەسەگە كەمىدى. بۇل كەزەڭدە بارلىعى 4418 قارا مال سويىلدى» ، - دەدى بەرىكجان قايىپباي.
دەگەنمەن، كەي وڭىرلەردە جاعداي ءالى قالىپقا كەلە قويعان جوق. ماسەلەن، 2017 -جىلى وبلىستىڭ 3 اۋدانىندا 115 جانۋاردان اسا قاۋىپتى نودۋليارلىق دەرماتيت اۋرۋىنىڭ بەلگىلەرى انىقتالعان. الايدا، سالا ماماندارى اۋرۋدىڭ دەر كەزىندە الدىن الدى. قازىر اتالعان تۇلىكتەردىڭ بارلىعىنا كەشەندى ەمدەۋ شارالارى قولدانىلدى. ايتا كەتەيىك، اتالعان ىندەتپەن كۇرەسۋ ءۇشىن جىل سايىن قوماقتى قارجى ءبولىنىپ كەلەدى.
«ارقالىق قالاسىنىڭ اۋماعىندا 2017 -جىلى جۇقپالى مال اۋرۋىنىڭ دەڭگەيى% 1,8 وسكەن. سوندىقتان، ىندەتتى ۋشىقتىرىپ الماس ءۇشىن سالالىق باسقارما قالالىق اكىمدىككە فۋرمانوۆ، جالعىزتال، ەكىدىڭ، كوكتاۋ، جاڭاقالا اۋىلدارىندا برۋتسەللەزدى قوسىمشا زەرتتەۋدى مىندەتتەدى. ءبىراق، ودان ەش ناتيجە شىققان جوق. اتى اتالعان ەلدى مەكەندەردە اۋرۋعا شالدىققان 5030 قارا مال ەسەپكە الىنسا، سونىڭ بار بولعانى 1562سى عانا تەكسەرىلگەن» ، - دەدى باسقارما باسشىسى.
ۆەتەريناريا باسقارماسى جوسپارلى تەكسەرۋلەردەن كەيىن، وتكەن جەلتوقسان ايىندا سويىلعان مالداردان تۋبەركۋللەز اۋرۋىن انىقتاپتى. بۇل اشا تۇياقتىلار «ارقالىق تاجىربيە ستانساسى» ج ش س- ىنە تيەسىلى. وسىدان كەيىن شارۋاشىلىقتاعى بارلىق 417 ءىرى قارا تەكسەرىلگەن. سونىڭ 26 سى قاۋىپتى ىندەتتى جۇقتىرعانى بەلگىلى بولدى. مۇنى استاناداعى ۆەتەرينارلىق رەفەرەنت ورتالىعى دا راستادى.
بەرىكجان قايىپبايدىڭ سوزىنشە، جەرگىلىكتى جەردەگى ماماندار ىندەتتىڭ تارالۋىن جاسىرادى. بۇل اۋرۋدى ورشىتپەسە، كەمىتپەسى انىق. ماسەلەن، ارقالىقتاعى شارۋاشىلىقتا اۋرۋ وشاعى جيىرما كۇن بۇرىن انىقتالعانمەن، يەسى ماماندارعا حابار بەرمەگەن. سايكەسىنشە، الدىن الۋ شارالارى دەر كەزىندە جۇرگىزىلمەگەندىكتەن، ونى ساۋىقتىرۋ دا ءبىراز ۋاقىتتى الدى.
وبلىس اكىمى ارحيمەد مۇحامبەتوۆ باسقارما باسشىسىنا مال اۋرۋى ءورشىپ تۇرعان وڭىرلەردى قاتاڭ باقىلاۋدا ۇستاۋ قاجەتتىگىن قاتاڭ تاپسىردى.
«اتقارىلعان جۇمىستارعا ەش ءشۇبا كەلتىرمەيمىن. ءبىراق، ول جەتكىلىسىز. جۇقپالى دەرتتىڭ الدىن الۋ شارالارىن پارمەندى تۇردە جۇرگىزۋ قاجەت. ەگەر جەرگىلىكتى جەرلەردە ءتيىستى جۇمىستار ءوز دەڭگەيىندە اتقارىلمايتىن بولسا، وندا ءتيىستى ماماندار جاۋاپ بەرۋى ءتيىس. مۇنداي كەمشىلىكتەردى جىبەرمەۋ قاجەت» ، - دەدى ءوڭىر باسشىسى.
