قازاق- بەلارۋس كاسىپكەرلەرى 100 ميلليون دوللاردان استام سوماعا كەلىسىم جاساستى
شارا بارىسىندا ەكى ەلدىڭ ىسكەرلىك توپتارىنا قازاقستان مەن بەلارۋستىڭ يننوۆاتسيالىق مۇمكىنشىلىكتەرى تانىستىرىلىپ، ەكىجاقتى ىنتىماقتاستىقتىڭ وزەكتى ماسەلەلەرى تالقىلاندى جانە ولاردى دامىتۋدىڭ كەلەشەگى ءسوز بولدى. جەڭىل ونەركاسىپ، اۋىل شارۋاشىلىعى، تاماق ونەركاسىبى، تاۋ- كەن سالاسى، مەتاللۋرگيا، بايلانىس قۇرال- جابدىقتارىن شىعارۋ، وڭدەۋ ونەركاسىبى سىندى سالالاردىڭ كاسىپورىندارى ەكىجاقتى ىسكەرلىك كەزدەسۋلەرىن دە وتكىزۋگە مۇمكىندىك الدى. ماسەلەن، فورۋم اياسىندا «قازاقستان تەمىر جولى» ۇ ك» ا ق باسشىسى قانات الپىسبايەۆ بەلارۋس تەمىرجولىنىڭ باستىعى ۆ. موروزوۆپەن كەلىسسوز جۇرگىزدى. كەزدەسۋ بارىسىندا كولىك جانە لوگيستيكا سالاسىنداعى سەرىكتەستىك ماسەلەسىن جالعاستىرۋ جايى قارالدى. تاراپتار ق ح ر- ە و- ق ح ر باعدارىنداعى ترانزيتتىك كونتەينەرلىك تاسىمالدى دامىتۋعا قولايلى جاعدايلار جاساۋعا باسا نازار اۋداردى.
ەكى ەلدىڭ بيزنەس فورۋمىنا قازاقستان اتىنان قاتىسقانداردىڭ ءبىرى 31 وتاندىق وڭدەۋ جانە جەڭىل ونەركاسىبىنىڭ باسىن قوساتىن «جاسامپاز» كونسورتسيۋمى بولدى. اتالعان كونسورتسيۋمنىڭ اتقارۋشى كەڭەسىنىڭ ءتورايىمى گۇلميرا ۋاحيتوۆا فورۋم جۇمىسىنا جوعارى باعا بەرىپ، ونىڭ ەكى ەلدىڭ بيزنەس وكىلدەرى اراسىنداعى ىنتىماقتاستىقتى دامىتۋعا تىڭ سەرپىن بەرەتىندىگىن اتاپ ءوتتى.
«قازاقستاندا جەڭىل ونەركاسىپ بۇيىمدارىن وندىرۋگە قاجەتتى شيكىزاتى جەتكىلىكسىز. سوندىقتان ءبىز جاڭا نارىقتار ىزدەۋگە، بايلانىستاردى جولعا قويىپ، ىسكەرلىك سەرىكتەس تابۋعا ءماجبۇرمىز. وسىعان بايلانىستى وسى بيزنەس فورۋم بارىسىندا بەلارۋس وندىرۋشىلەرىمەن شيكىزات ماسەلەسىن تالقىلاپ، تىكەلەي بايلانىس ورناتتىق جانە ءوزارا ءتيىمدى ىنتىماقتاستىقتى جالعاستىرۋعا ۋاعدالاستىق. ءبىزدىڭ كونسورتسيۋم بەلارۋسقا وتاندىق وندىرشىلەردىڭ ونىمدەرىن جەتكىزۋدى جانە ساتۋدى ۇسىندى» ، - دەيدى گۇلميرا ۋاحيتوۆا.
ايتا كەتەرلىگى، فورۋم ناتيجەسىندە ەكى ەلدىڭ ىسكەرلىك توپتارى جالپى سوماسى 100 ميلليون دوللاردان اساتىن بىرنەشە كوممەرتسيالىق كەلىسىمگە قول قويدى.
ايتا كەتەيىك، اعىمداعى جىلدىڭ 9 ايىندا قازاقستان مەن بەلارۋس اراسىنداعى تاۋار اينالىمى 441,4 ميلليون دوللارعا جەتىپ، 60 پايىزعا ارتتى. ەكسپورت 2,4 ەسەگە ەسەلەنىپ، 68 ميلليون دوللارعا جەتسە، يمپورت ءوسىمى 51,1 پايىزدى قۇراپ، 373,4 ميلليون دوللار بولدى.
اۆتور: مارلان جيەمباي
