ءماجىلىس دەپۋتاتى: قىرعىزستان باس تارتقان 100 ميلليون دوللار ەل يگىلىگىنە جۇمسالادى
ءماجىلىس دەپۋتاتى ماۋلەن اشىمبايەۆ قىرعىزستاننىڭ قازاقستانمەن جاسالعان كەلىسىمنىڭ كۇشىن جوياتىنى تۋرالى رەسمي حابارىنا قاتىستى پىكىر ءبىلدىردى، دەپ حابارلايدى Sputnik.
ايتا كەتسەك، قىرعىزستان پارلامەنتىنىڭ بيۋدجەت جانە قارجى جونىندەگى كوميتەتى قازاقستانمەن جاسالعان 100 ميلليون دوللار كومەك تۋرالى كەلىسىمنىڭ كۇشىن جويۋ جونىندەگى زاڭ جوباسىن ماقۇلداعان بولاتىن. ەندى زاڭ جوباسىن پارلامەنتتىڭ باسقا كوميتەتتەرى قاراستىرادى، ودان كەيىن قۇجات جوگوركۋ كەنەشتىڭ جالپى وتىرىسىنا شىعارىلادى. قىرعىزستاننىڭ سىرتقى ىستەر مينيسترلىگى بىرەر كۇن بۇرىن قازاقستاندىق تاراپتى كەلىسىمنىڭ كۇشىن جويۋ راسىمدەرى باستالىپ كەتكەنىن تۋرالى رەسمي حابارلاندىردى.
«بۇل قوماقتى قارجى. قازىرگى زاماندا 100 ميلليون دوللار از اقشا ەمەس ەكەنىن تۇسىنەمىز. قازاقستاندا بۇل قارجىنى جاراتۋعا بولاتىن سالا مەن باعىتتار تابىلاتىنىنا مەن سەنىمدىمىن. ءبىرىنشى كەزەكتە، ارينە، الەۋمەتتىك سالا نازاردا بولۋعا ءتيىس. ءبىزدىڭ ەلىمىزدىڭ الدىندا تۇرعان ماقسات-مىندەتتەر كوپ، سوندىقتان بۇل قارجى ەلدىڭ يگىلىگىنە جۇمسالاتىنىنا سەنىم بىلدىرەمىن»، - دەدى اشىمبايەۆ ب ا ق وكىلدەرىنىڭ سۇراعىنا جاۋاپ بەرە وتىرىپ.
ول قازاقستاننىڭ كورشى مەملەكەتتىڭ الدىنداعى بارلىق مىندەتىن ورىنداعانىن ايتىپ، بۇل جاعدايدى ۋشىقتىرا بەرمەۋگە شاقىردى.
قازاقستان بيىلعى جىلى شىلدەدە قىرعىزستانعا 100 ميلليون دوللار ءبولۋ تۋرالى كەلىسىمدى راتيفيكاتسيالادى. بۇل قاراجات قىرعىزستانعا ەۋرازيا ەكونوميكالىق وداققا قوسىلۋىنا بايلانىستى ءىس-شارالارى جۇزەگە اسىرۋ ءۇشىن ۇسىنىلدى.
