09:43, 15 - قازان 2017 | GMT +6
جەر جىرتىپ جۇرگەن تراكتورشى سالماعى 100 كەلى بومبا تاۋىپ الدى
استانا. قازاقپارات - پريمورە قۇتقارۋشىلارى جەر جىرتىپ جۇرگەن تراكتورشى تاۋىپ العان سالماعى 100 كەلى اۆيابومبانى جويدى.
بۇل تۋرالى رەسەي ت ج م امۋر قۇتقارۋ ورتالىعىنىڭ باسپا ءسوز قىزمەتى حابارلادى.
«سەنبى كۇنى رەسەي ت ج م امۋر قۇتقارۋ ورتالىعىنىڭ قۇتقارۋشىلار توبى پيروتەحنيكالىق جانە جارۋ جۇمىستارى ارقىلى پريمورە ولكەسىندەگى ۆوزدۆيجەنكا ستانساسى مەن ستەپنوە ەلدى مەكەنى اراسىنداعى ەگىستىكتەن تابىلعان جارىقشاقتى-فۋگاستى اۆياتسيالىق بومبانى زالالسىزداندىردى»، - دەلىنگەن حابارلامادا.
اۆيابومبانى جويۋ ءۇشىن ماماندار باستىرما وقتامدى تروتيلدى پايدالانعان. بۇل جەردە بۇرىن اسكەري پوليگون بولعان.
وق-ءدارى تابىلعان اۋماق قورشالىپ، پوليتسيا جاساعى قويىلدى.
جەرگىلىكتى تۇرعىندارعا قاۋىپتى زات تۋرالى حابارلانىپ، ساقتىق شارالارىن ساقتاۋ قاجەتتىگى ەسكەرتىلدى.
