شەتەلدەگى قازاقتاردىڭ 100 جاڭا ەسىمى انىقتالادى
ال 22-25 - ماۋسىم كۇندەرى وتەتىن دۇنيەجۇزى قازاقتارىنىڭ بەسىنشى قۇرىلتايى دا ەلباسى ماقالاسىمەن ۇندەسىپ، «رۋحاني جاڭعىرۋ جانە شەتەلدەگى قازاقتار» تاقىرىبىمەن وتپەكشى. وسى ورايدا دۇنيەجۇزى قازاقتار قاۋىمداستىعى ءتوراعاسىنىڭ ءبىرىنشى ورىنباسارى تالعات ماماشيەۆ مىرزامەن سۇقباتتاسۋدىڭ ءساتى تۇسكەن بولاتىن. اڭگىمە بارىسىندا قازاقستاننىڭ 100 جاڭا تۇلعاسىنىڭ قاتارىنا شەتتەگى قانداستارىمىز كىرە الا ما دەگەن ساۋالىمىزعا ماماشيەۆ مىرزا جاۋاپ بەرگەن ەدى، دەپ جازادى BAQ.kz ءتىلشىسى.
«ءبىز شەتەلدەگى قازاقستاردىڭ 100 جاڭا ەسىمىن شىعارعىمىز كەلەدى. قازىردەن باستاپ بۇل جۇمىس قولعا الىنا باستادى. قۇرىلتاي كەزىندە بۇل اڭگىمە ايتىلادى. ءبىز شەتەلدە جۇرگەن 5 ميلليون قانداستىڭ ىشىنەن 100 جاڭا تۇلعانى انىقتايمىز. سونىڭ ىشىندە ەندى، بىرەن- ساران بۇرىنعىلار دا بولاتىن شىعار، نەگىزىنەن، قازىر ويلاپ قاراساق، عىلىم سالاسىندا، بيزنەستە، مادەنيەتتە، جالپى قوعامنىڭ بارلىق سالاسى بويىنشا امەريكادا، كانادادا، اۆستراليادا ءبىزدىڭ قانداستارىمىز ءجۇر. ولار تۇلعا ەمەس پە؟ ارينە تۇلعا. عالىم دەسەڭ عالىم، دارەجە دەسەڭ دارەجەسى بار. ءبىز بۇل جۇمىستى جۇرگىزەمىز. مۇمكىن ول بىزدەگى «100 جاڭا تۇلعانىڭ» بالاماسى بولار، ءبىراق، ول دا كەرەك دەپ ويلايمىن» - دەيدى تالعات ماماشيەۆ.
قازاقتىڭ كيەلى جەرلەرىن تۇگەندەۋدى، سونىڭ كارتاسىن جاساۋدى تاپسىردى ەلباسى. ال ءبىزدىڭ ەجەلگى كيەلى جەرلەرىمىزدىڭ بارلىعى كورشى ەلدەردىڭ تەرريتورياسىندا قالىپ كەتتى. تالعات ماماشيەۆتىڭ ايتۋىنا قاراعاندا «ساكرالدى قازاقستان» ارقىلى بولاشاقتا شەت ەلدەگى قازاققا قاتىستى كيەلى جەرلەردىڭ دە كارتاسى جاسالىپ قالۋى مۇمكىن.
«ءبىز بۇل شارۋامەن اينالىسىپ جاتىرمىز دەپ ايتا المايمىن. ءبىراق بۇل ماسەلەگە قاتىستى اڭگىمە بار. ەلباسى قاتىسقان پلەنارلىق وتىرىستا ءسوز سويلەيتىن موڭعوليادان كەلەتىن قانداس باۋىرىمىز باكەي اعىپار ۇلى وسى تاقىرىپتى كوتەرمەك. ويتكەنى كۇلتەگىن دە ءالى سول جەردە، تونىكوك تە سول جەردە تۇر. مىناۋ رەسەيدىڭ قوشاعاش جەرىندە، التايدىڭ ءتورت ەمشەگىن ەمگەن ەلدىڭ بارلىعىندا قازاقتىڭ كيەلى جەرلەرى بار. ونى ايتا بەرسەك كيەلى جەرلەر جەتەرلىك. ءبىز ونى تولىقتىرۋىمىز كەرەك» - دەيدى دۇنيەجۇزى قازاقتار قاۋىمداستىعى ءتوراعاسىنىڭ ورىنباسارى تالعات ماماشيەۆ.
ەرجان جاۋباي
