بەرىك ءابدىعالي ۇلى: الاشوردانىڭ 100 جىلدىعىن كەڭىرەك اتاپ وتۋگە ۇلەس قوسۋ كەرەك
بۇگىن قوعام قايراتكەرى، ساياساتتانۋشى بەرىك ءابدىعالي ۇلى وسىلاي ءمالىم ەتتى، دەپ حابارلايدى قازاقپارات.
بيىل الاش قوزعالىسىنىڭ عاسىرلىق تويى - الاش ۇلتتىق اۆتونومياسىنىڭ، الاش پارتياسىنىڭ جانە الاش ۇكىمەتىنىڭ قۇرىلعانىنا 100 جىل تولىپ وتىر.
«شىن مانىندە ۇكىمەت تاراپىنان الاشوردانىڭ 100 جىلدىعىنا ارنالعان شارالارىمەن قاتار، ءوزىمىز ءاربىر ازامات پەن عالىم، قوعام قايراتكەرى «مەن نە ىستەي الامىن؟» دەگەن ويدا بولۋى ءتيىس دەپ سانايمىن. بۇل اتاۋلى داتانى كەڭ كولەمدە اتاپ وتپەۋ ۇلكەن قيانات. سوندىقتان عالىمدار، زيالى قاۋىم وكىلدەرى ءوز ۇلەستەرىن بىرىگىپ قوسسا دەگەن تىلەك بار»، - دەپ توقتالدى بەرىك ءابدىعالي ۇلى.
وسى ورايدا ول بۇگىنگە دەيىن الاش قوزعالىسىنا قاتىستى كوپتەگەن ەڭبەكتەر جاريالانعانىن ايتا كەلە:
«الداعى ۋاقىتتا ءالى دە شىعاتىنى انىق. ءبىراق سونىمەن قاتار زەرتتەلمەگەن تاقىرىپتار دا بارشىلىق. اتاپ ايتقاندا، بەلگىسىز تاقىرىپتاردىڭ ءبىرى الاش اسكەرىنە قاتىستى ەدى. شىن مانىندە الاش اسكەرىنىڭ ورنى ەرەكشە دەپ ەسەپتەيمىز. ءۇش جىلدان بەرى رەسەي ارحيۆتەرىندە جۇمىس ىستەپ، بيىل كۇزگە قاراي كىتابىم شىعادى دەپ جوسپارلاپ وتىرمىن»، - دەدى. ب. ءابدىعالي ۇلىنىڭ پايىمىنشا، ارماندا كەتكەن بابالارىمىزدىڭ ەسىمىن جاڭعىرتۋ، ەرلىكتەرىن كورسەتۋ بۇگىنگى ۇرپاقتىڭ ۇلكەن مىندەتى بولۋى ءتيىس.
بۇدان بۇرىن حابارلاعانىمىزداي، اعىمداعى جىلدىڭ باسىندا الاشوردا قوزعالىسىنىڭ قۇرىلعانىنا 100 جىل تولۋىنا وراي الاش زيالىلارىنىڭ شىعارماشىلىق مۇرالارىن زەردەلەۋ جانە ونى جانداندىرۋ ماسەلەلەرى بويىنشا كەڭەس ءوتىپ، ۇكىمەت الاشوردانىڭ 100 جىلدىعىن كەڭ كولەمدە اتاپ وتۋگە ازىرلەنە باستاعان ەدى. بۇل رەتتە، الاش قوزعالىسىنىڭ تاۋەلسىزدىك مۇراتتارى ءۇشىن كۇرەستەگى ءرولى مەن ماڭىزىن، ونىڭ كوشباسشىلارىنىڭ ساياسي- قۇقىقتىق، ۇلتتىق قۇندىلىقتارعا قاتىستى كوزقاراستارىن، تۇجىرىمدارىن جاڭا زاماننىڭ تالاپتارىنا ساي زەردەلەۋ ەسكەرىلگەن بولاتىن.
اۆتور: رۋسلان عابباسوۆ
