قازاقستاندا 100 ميلليون گەكتار جايىلىم پايدالانىلمايدى

تاراز. قازاقپارات - جامبىل وبلىسىندا جايىلىمدار تۋرالى زاڭ جوباسىن تانىستىرۋ ماقساتىندا دەپۋتاتتاردان قۇرالعان توپ جۇمىس ىستەپ جاتىر.

 تارازدا بولعان كوميتەت وتىرىسىندا ءبىز «جايىلىمدار تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جايىلىمدار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىنىڭ نورمالارىن، سونىڭ ىشىندە ەلدىڭ وڭتۇستىك وڭىرىندەگى جايىلىم جەرلەرىن پايدالانۋ ماسەلەسىن تالقىلادىق.

اگرارلىق ماسەلەلەر كوميتەتىنىڭ كوشپەلى وتىرىسى بۇعان دەيىن باسقا وڭىرلەردە دە وتكىزىلگەن. ال بۇل جولى ءبىز الماتى، جامبىل جانە وڭتۇستىك قازاقستان وبلىستارى وكىلدەرىنىڭ باسىن قوسقالى وتىرمىز»، - دەيدى اگرارلىق ماسەلەلەر كوميتەتىنىڭ ءتوراعاسى ساپارحان وماروۆ.

زاڭ جوباسى مەملەكەت باسشىسىنىڭ جولداۋىندا جۇكتەلگەن تاپسىرمالاردى ورىنداۋ ماقساتىندا ازىرلەنگەن. ەلباسى «قازاقستان2050 ستراتەگياسى: قالىپتاسقان مەملەكەتتىڭ جاڭا ساياسي باعىتى» اتتى جولداۋىندا وتاندىق مال شارۋاشلىعىن ءداستۇرلى تۇردە جۇرگىزۋ ءۇشىن جاڭا عىلىمي- تەحنولوگيالىق باسقارۋشىلىق جەتىستىكتەردى ەسكەرە وتىرىپ، شالعايداعى مال شارۋاشىلىعىن دامىتۋ مەن قايتا جاڭعىرتۋدى تاپسىرعان بولاتىن. اتالعان زاڭ جوباسى جايىلىمداردى ءتيىمدى پايدالانۋدى كوزدەيدى. قازىرگى تاڭدا قازاقستاندا 180 ميلليون گ ا جايىلىم جەرى بار. ونىڭ تەك 80 ميلليونى پايدالانىلادى. وسى زاڭنىڭ نەگىزگى ماقساتى دا سول - قالعان 100 ميلليون گ ا جەردى پايدالانۋعا مۇمكىندىك بەرۋ»، - دەيدى ول.

شارا سوڭىندا قاتىسۋشىلار اتالعان زاڭ جوباسى بويىنشا جۇمىستى ارى قاراي جالعاستىرۋعا ۋاعدالاستى.