استانادا 100 ۇزدىك مەديتسينا قىزمەتكەرى ماراپاتتالدى - فوتو

استانا. قازاقپارات - ەلوردادا مەديتسينا قىزمەتكەرلەرىنىڭ ءتول مەرەكەسى قارساڭىندا وقۋشىلار سارايىندا ۇزدىك دارىگەرلەرگە ارنالعان سالتاناتى شارا وتكىزىلدى.

قالانىڭ دەنساۋلىق ساقتاۋ سالاسىنىڭ دامۋىنا ەلەۋلى ۇلەس قوسقان 100 مەديتسينا قىزمەتكەرىنە ماراپاتتار تابىستالدى، دەپ حابارلادى قالالىق اكىمدىكتىڭ باسپا ءسوز قىزمەتى.

شارا بارىسىندا استانا قالاسى اكىمىنىڭ ورىنباسارى ەرمەك امانشايەۆ دارىگەرلەردى قۇتتىقتاپ، ءسوز سويلەدى.

- ءبىزدىڭ ومىرىمىزدەگى سيقىرشىلار - سىزدەر. ءبىزدىڭ تاراپىمىزدان، مەملەكەت تاراپىنان، قالا اكىمدىگىمەن دەنساۋلىق ساقتاۋ سالاسىنا باسا نازار اۋدارىلادى، سوڭعى ۋاقىتتا ەلوردادا اتالعان سالانىڭ قارقىندى دامۋى بايقالادى. وسى كۇنى سىزدەرگە ەڭبەكتەرىڭىز ءۇشىن العىس ايتىپ، ءتول مەرەكەلەرىڭىزبەن قۇتتىقتايمىن! - دەدى ە. امانشايەۆ.

دەنساۋلىق ساقتاۋ سالاسىندا كوپ جىلدار بويى تابىستى ەڭبەك ەتكەنى، حالىققا ساپالى قىزمەت كورسەتۋ جونىندەگى ماسەلەلەردى شەشۋگە بەلسەندى اتسالىسقانى ءۇشىن ۇزدىك مەديتسينا قىزمەتكەرلەرىنە «دەنساۋلىق ساقتاۋ ىسىنە قوسقان ۇلەسى ءۇشىن»، «دەنساۋلىق ساقتاۋ ءىسىنىڭ ۇزدىگى» توسبەلگىلەرى، سونىمەن قاتار، استانا قالاسىنىڭ اكىمى ادىلبەك جاقسىبەكوۆتىڭ جانە ەلوردالىق دەنساۋلىق ساقتاۋ باسقارماسىنىڭ باسشىسى ەرىك بايجۇنىسوۆتىڭ اتىنان قۇرمەت گراموتالارى مەن العىس حاتتار تابىستالدى.

بيىل العاش رەت دارىگەرلەر بەس نوميناتسيا بويىنشا ماراپاتتالدى. ءاربىر ماراپاتتاۋدىڭ الدىندا جينالعان قاۋىم دارىگەردىڭ قىزمەتى تۋرالى تولىق باياندايتىن بەينەروليك تاماشالادى.

مەديتسينا قىزمەتكەرىنىڭ اسقان شەبەرلىگىن اتاپ وتەتىن «ماماندىعىنا ادالدىعى ءۇشىن» ارنايى نوميناتسياسىندا ولگا زامولوتوۆا، «بىرەگەي وپەراتسيا وتكىزىپ، ادام ءومىرىن قۇتقارعانى ءۇشىن» نوميناتسياسىندا №2 -قالالىق اۋرۋحانا دارىگەرلەرىنىڭ كومانداسى: مارات جاقسىلىقوۆ، بايماحانبەت سادۋوۆ، بولاتحان لەپەسبايەۆ ماراپاتتالدى.

مۇنىمەن قوسا، «دياگنوستيكالاۋ مەن ەمدەۋدىڭ جاڭا ءادىسىن ويلاپ تاپقانى ءۇشىن»، «ماماندىعىنا ادالدىعى ءۇشىن - وتباسىلىق اۋلەتتەر» نوميناتسيالارى بەلگىلەندى. «جاڭا ءومىر سىيلاعانى ءۇشىن» نوميناتسياسىندا استانا قالاسىنىڭ اكىمدىگى №1 پەريناتالدى ورتالىعىنىڭ جاڭا تۋعان سابيلەردى كۇتۋ جانە پاتولوگيالار ءبولىمىنىڭ مەڭگەرۋشىسى يرينا تسۋبەنكو ماراپاتتالدى.

بۇگىنگى تاڭدا استانادا 36 ۇيىم مەديتسينالىق قىزمەتتەر ۇسىنادى. سوڭعى 5 جىلدا ەلوردادا 9 مەديتسينالىق مەكەمە سالىنىپ، ولاردا 9424 مەديتسينا قىزمەتكەرى، سونىڭ ىشىندە 3202 دارىگەر جۇمىس ىستەيدى. ەلوردالىق كلينيكالاردا ەمدەۋ مەن دياگنوستيكالاۋدىڭ جاڭا ادىستەرى ۇدايى ەنگىزىلىپ وتىرادى، بۇعان دەيىن تەك رەسپۋبليكالىق اۋرۋحانالاردا عانا كورسەتىلىپ كەلگەن جوعارى مامانداندىرىلعان مەديتسينالىق كومەك كورسەتىلەدى.