قازاقستاندا 100 دەن استام ادام تۇرمىستىق جانجال كەسىرىنەن كوز جۇمعان
بۇل تۋرالى بۇگىن ق ر ىشكى ىستەر ءمينيسترى قالمۇحانبەت قاسىموۆ ءمالىم ەتتى.
وسىعان بايلانىستى مينيستر ۋچاسكەلىك ينسپەكتورلاردىڭ جۇمىسىن سىنعا الدى.
«ءبىزدىڭ ۋچاسكەلىك ينسپەكتورلار ءال-اۋقاتى ناشار وتباسىلارمەن جوسپارلى جۇمىستى ءتيىستى تۇردە اتقارا بەرمەيدى. جانجالدى الدىن الۋعا باعىتتالعان ءىس- شارالار مەرزىمىندە جاسالمايدى. بۇل جاعداي تۇرمىستىق جانجالدار بارىسىندا كىسى ءولىمىنىڭ سانىن ارتتىرىپ وتىر. قازاقستاندا بىلتىر جانە اعىمداعى جىلى 100 دەن استام ادام تۇرمىستىق جانجال كەسىرىنەن كوز جۇمعان»، - دەدى مينيستر.
ق. قاسىموۆتىڭ ءسوزى بويىنشا، ينسپەكتورلار وزىنە تيەسىلى اۋماقتا ىشكىلىكتىڭ الدىن الۋعا قاتىستى شارالارى ناتيجەسىز اياقتالاتىنىنا كوڭىل اۋداردى.
«تۇرمىستىق جاعدايدا جاسالعان اۋىر قىلمىستاردىڭ 10 پايىزدان استامى ىشكىلىكتىڭ كەسىرىنەن بولاتىنى دا تەگىن ەمەس»، - دەدى ق ر ءى ءى م باسشىسى.
ءمينيستردىڭ ايتۋىنا قاراعاندا، جۇمىس ساپاسىنا ۋچاسكەلىك ينسپەكتورلاردىڭ ەڭبەك ەتۋىنە قاجەتتى ماتەريالدىق قامسىزداندىرۋدىڭ جەتىسپەۋشىلىگى اسەر ەتۋى ىقتيمال.
«ءبىرقاتار ايماقتاردا ينسپەكتورلاردىڭ جۇمىسىنا قاجەتتى بارلىق جاعدايلار جاسالماعان. ەلدە بار 2700 ۋچاسكەلىك ورتالىقتاردىڭ 1400 ىنە جوندەۋ جۇمىستارى قاجەت. ونىڭ ۇستىنە قوسىمشا 430 ورتالىقتى جاڭادان سالۋ قاجەت. ۋچاسكەلىك ينسپەكتورلاردىڭ ۇشتەن بىرىندە پاتەر جوق، اۋىلدىق ينسپەكتورلاردىڭ ۇشتەن بىرىندە كولىك پەن راديوستانسا جوق»، - دەدى ق ر ءى ءى م ءمينيسترى.
اۆتور: جاسۇلان جولدىبايەۆ
