بۇگىن كاۋكەن كەنجەتايەۆتىڭ دۇنيەگە كەلگەنىنە 100 جىل
1916 - جىلى پاۆلودار وبلىسى باياناۋىل اۋدانىندا تۋعان. ماسكەۋ كونسەرۆاتورياسى جانىنداعى قازاق ستۋدياسىن، الماتى كونسەرۆاتورياسىن بىتىرگەن.
1942-1946 - جىلدارى ارالىعىندا حاباروۆسكىدەگى شەكاراشىلار انسامبلىندە قىزمەت ەتتى. 1946 - جىلدان قازاق وپەرا جانە بالەت تەاترىنىڭ ءانشىسى. ول تارعىن، جالبىر، بەكەجان، سەمەن (ە. گ. برۋسيلوۆسكيدىڭ «ەر تارعىن»، «جالبىر»، «قىز جىبەك»، «دۋدارايىندا» )، جانبوتا (م. تولەبايەۆتىڭ «ءبىرجان- ساراسىندا» )، ەسكاميلو (ج. بيزەنىڭ «كارمەنىندە» )، دەمون (ا. گ. رۋبينشتەيننىڭ «دەمونىندا» )، اموناسترو (دج. ۆەرديدىڭ «ايداسىندا» )، ت. ب. پارتيالارى ونىڭ انشىلىك، ورىنداۋشىلىق تالانتىن ءار قىرىنان اشقان وبرازدار بولدى.
ول 1957 - جىلدان باستاپ كينوفيلمدەرگە ءتۇسىپ، رەجيسسەر («جەرگە قايتا ورالۋدا» ) ، ءانشى- ءارتىس («ءبىزدىڭ سۇيىكتى دارىگەردە» )، باۋىرجان مومىش ۇلى («ەل باسىنا كۇن تۋسادا» )، قازانعاپ («بوراندى بەكەتتە» )، بازارباي («قىز جىبەكتە» )، تاعى باسقا رولدەرىمەن كورەرمەن ىقىلاسىنا بولەنگەن.
كەنجەتايەۆ رەجيسسەر رەتىندە برۋسيلوۆسكيدىڭ «ەر تارعىن»، «جالبىر»، «قىز جىبەك»، «امانگەلدى»، س. مۇحامەدجانوۆتىڭ «ايسۇلۋ»، ە. راحماديەۆتىڭ «الپامىس»، پ. ي. چايكوۆسكيدىڭ «قارعانىڭ ماتكەسى»، ت. ب. وپەرالارىن قويدى.
سونىمەن قاتار «الدار كوسەنىڭ ايلاسى»، «قالقامان - مامىر»، «ساپار»، «بايان جۇرەك»، «قۇسني - حورلان» ، ت. ب. وپرەالار ليبرەتتولارىنىڭ اۆتورى. «سيلۆا»، «تىنىش شاڭىراق»، «فيگارونىڭ ۇيلەنۋى» وپرەالارىنىڭ ليبرەتتولارىن قازاق تىلىنە اۋدارعان. «دارحان دارىن»، «ءماجيت بەگالين»، «ۆىسوكيي دار پريزۆانيا» اتتى كىتاپتارى جارىق كورگەن. ونىڭ رەپەرتۋارىندا قازاقتىڭ حالىق اندەرىمەن قاتار ورىس، ۋكران، تاتار، وزبەك حالىقتارىنىڭ حالىق اندەرى، سونداي- اق، باتىس ەۋروپا كومپوزيتورلارىنىڭ شىعارمالارى بار. ول گاسترولدىك ساپارمەن ك س ر و- نىڭ قالالارىندا جانە كوپتەگەن شەتەلدەردە بولعان. 2008 - جىلى قايتىس بولعان. ەڭبەك قىزىل تۋ وردەنىمەن جانە مەدالدارمەن ماراپاتتالعان.
29 - اقپان كۇنى پاۆلوداردا ج. ايماۋىتوۆ اتىنداعى وبلىستىق قازاق مۋزىكالى- دراما تەاترىندا كاۋكەن كەنجەتايەۆتىڭ 100 جىلدىعىنا ارنالعان «قازاق ونەرىنىڭ حاس تالانتى» اتتى ەسكە الۋ كەشى وتكىزىلەدى.
