ۇلت جوسپارى «100 قادامنىڭ» رەسەي ءۇشىن دە ماڭىزى ەرەكشە - ۆ. امەلين

استانا. قازاقپارات - «100 قادام» ۇلت جوسپارىنىڭ رەسەي ءۇشىن دە ماڭىزى ەرەكشە.

بۇگىن ماجىلىستە «قازاقستان حالقى اسسامبلەياسى» دەپۋتاتتىق توبى رەسەي فەدەراتسياسى ورىنبور قالاسىنان كەلگەن ءبىر توپ عالىمدار دەلەگاتسياسىمەن جۇزدەستى.

وندا اڭگىمە نەگىزىنەن «بارشاعا ارنالعان قازىرگى زامانعى مەملەكەت - 100 ناقتى قادام» رەسەيدىڭ باعالاۋى جانە رەسەي ءۇشىن» تاقىرىبى اياسىندا ءوربىدى.

جۇزدەسۋ بارىسىندا دەلەگاتسيا باسشىسى، ر ف ورىنبور وبلىسى حالىقتار اسسامبلەياسىنىڭ ءتوراعاسى ۆەنالي امەلين مەملەكەت باسشىسى ن. نازاربايەۆ ايقىنداعان «100 قادام» ۇلت جوسپارىنىڭ ماڭىزدىلىعىنا توقتالا كەلە، وندا ۇلتتىق بىرتەكتىلىك ماسەلەسىنىڭ وزەكتى بولىپ تابىلاتىندىعىنا نازار اۋداردى.

«بۇل قازىرگى قازاقستان تالقىلايتىن عانا ماسەلە ەمەس، ونىڭ رەسەي ءۇشىن دە ماڭىزدىلىعى ەرەكشە. ويتكەنى، رەسەي مەيلىنشە پوليەتنيكالى، كوپكونفەسسيالى مەملەكەت. سوڭعى 2010 -جىلعى ساناق بويىنشا رەسەيدە 193 ۇلت وكىلدەرى تۇرىپ جاتىر»، - دەدى ۆ. امەلين.

 بۇدان بولەك، دەلەگاتسيا باسشىسى قازاقستان مەن رەسەي اراسىنداعى قارىم- قاتىناسقا توقتالا كەلە، ەكى ەلدە تۇرىپ جاتقان باۋىرلاس حالىقتاردىڭ بايلانىسىندا ازاماتتىق قوعام ينستيتۋتى ماڭىزدى ءرول اتقاراتىنىنا توقتالدى. سونىڭ ىشىندە قازاقستان حالقى اسسامبلەياسى مەن رف حالىقتارى اسسامبلەياسىنىڭ ورنى ەرەكشە.

 «تۇتاستاي العاندا، ن. نازاربايەۆتىڭ «100 قادام» ۇلت جوسپارى باعدارلاماسىن ءبىز جوعارى باعالايمىز. تاجىريبە الماسىپ، ءبىر- بىرىمىزدەن كوپتەگەن پايدالى كەڭەستەر الۋعا ۇلكەن ءمان بەرىپ كەلەمىز. ماسەلەن، بىزگە قازاقستاننىڭ جوعارى وقۋ ورىندارىندا، سونىڭ ىشىندە شەكارا ماڭىنداعى وقۋ ورىندارىندا قازاقستان حالقى اسسامبلەياسى كافەدرالارىنىڭ اشىلۋى ۇلكەن قىزىعۋشىلىق تۋدىرىپ وتىر. ءبىز وسى كافەدرالاردى اشۋ باعدارلاماسىن مۇقيات ءارى تىڭعىلىقتى زەردەلەۋگە مۇددەلىمىز. بۇل مەيلىنشە ءتيىمدى تاجىريبە»، - دەدى ۆ. امەلين.

اۆتور: قانات مامەتقازى ۇلى