استاناداعى ءى. ەسەنبەرليننىڭ 100 جىلدىعىنا ارنالعان كورمەدە جازۋشىنىڭ سيرەك كەزدەسەتىن بەينەجازبالارى تانىستىرىلدى

استانا. قازاقپارات - بۇگىن قازاقستان رەسپۋبليكاسىنىڭ ۇلتتىق مۇراعاتىندا قازاق حاندىعىنىڭ 550 جىلدىعىن مەرەكەلەۋ ءىس-شارالارى اياسىندا ۇلى جازۋشى، قازاق ادەبيەتىنىڭ كلاسسيگى ءىلياس ەسەنبەرليننىڭ 100 جىلدىعىنا ارنالعان «رۋحى بيىك نار تۇلعا» اتتى قۇجاتتىق كورمە اشىلدى.

كورمەگە اتباسار قالاسىنداعى ءى. ەسەنبەرلين اتىنداعى ادەبي مۇراجايدان جازۋشىنىڭ جۇمىس جاساعان ۇستەلى، قويىن كىتاپشاسى، تەلەفون انىقتامالىعى، سۇيىكتى دومبىراسى مەن وتباسى فوتوسۋرەتتەرى، جازۋ ماشينكاسى جانە باسقا دا زاتتارى اكەلىندى. سونىمەن قاتار، ق ر ورتالىق مەملەكەتتىك مۇراعاتى كورمەگە قازاقستان جازۋشىلار وداعى، جامبىل اتىنداعى قازاق مەملەكەتتىك فيلارمونياسى جانە ءى. ەسەنبەرليننىڭ جەكە قورىنان الىنعان قۇجاتتاردى ۇسىندى.

ال ق ر كينو فوتو قۇجاتتار جانە دىبىس جازبالار ورتالىق مەملەكەتتىك مۇراعاتى جازۋشىنىڭ «ايقاس» رومانى (1968-جىل) ءۇشىن اباي اتىنداعى مەملەكەتتىك سىيلىقتى تاپسىرۋ ساتىندەگى بەينە جازباسىن، ءى. ەسەنبەرلينمەن سۇحبات بەينە جازباسىن، جازۋشىنىڭ ءوز داۋسى جازىلعان فونو جازبانى دا ۇسىنىپ وتىر.

شاراعا مەملەكەتتىك ورگاندار مەن ۇيىمدار باسشىلارى مەن وكىلدەرى، قازاقستان جازۋشىلار وداعىنىڭ مۇشەلەرى، جازۋشىنىڭ تۋعان-تۋىسقاندارى قاتىستى.

اۆتور: ءابۋ-اسقار مەكەش ۇلى