قازاقستان اۋەجايلارىنىڭ ينفراقۇرىلىمىن دامىتۋعا 100 ميلليارد تەڭگە ينۆەستيتسيا سالىنادى

استانا. قازاقپارات - 2015-2017 - جىلدار ارالىعىندا قازاقستاننىڭ ءبىرقاتار اۋەجايلارىنىڭ ينفراقۇرىلىمىنا شامامەن 99 ميلليارد تەڭگە كولەمىندە ينۆەستيتسيالار سالىنادى.

بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگ بارىسىندا «Airoport Management Group» ج ش س باس ديرەكتورى كلود بانان مالىمدەدى.

«مەملەكەت باسشىسىنىڭ «نۇرلى جول» جولداۋىندا اۋەجايلاردى دامىتۋعا زور كوڭىل بولىنگەن. وسىعان بايلانىستى، 2015-2017 - جىلدار ارالىعىندا استانا، قىزىلوردا، پەتروپاۆل، قوستاناي اۋەجايلارىنىڭ ينفراقۇرىلىمىن دامىتىپ، ۇشىپ-قونۋ الاڭدارىن، جولاۋشىلار تەرمينالىن جاڭعىرتۋ بويىنشا ءىرى جوبالار جۇزەگە اسىرىلادى. استاناداعى حالىقارالىق اۋەجايدا جاڭا جولاۋشىلار تەرمينالى سالىنادى. ال ەسكىسى ىشكى رەيستەرگە ارنالاتىن بولادى. سونىمەن قاتار، شىمكەنت اۋەجايىنىڭ دا جاڭا جوباسى باستالدى»، - دەپ اتاپ ءوتتى ول.

ونىڭ ايتۋىنشا، پەتروپاۆل مەن قوستاناي اۋەجايلارىندا دا وسىنداي جۇمىستار جۇرگىزۋ جوسپارلانعان. «وندا جولاۋشىلار تەرمينالى جوندەۋدەن وتكىزىلىپ، ۇشىپ- قونۋ جولاقتارى جاڭعىرتىلادى. اتالعان اۋەجايلاردىڭ ينفراقۇرىلىمىنا سالىناتىن ينۆەستيتسيالاردىڭ جالپى قۇنى 99 ميلليارد تەڭگە بولادى»، - دەيدى كومپانيا باسشىسى.

ايتا كەتەيىك، AMG كومپانياسى قازاقستاندىق اۋەجايلاردى وڭتايلاندىرۋ ماقساتىندا جانە عالامدىق يندۋستريالاندىرۋعا قاتىسۋ ءۇشىن اۋە اكتيۆتەرىن باسقارۋ ماقساتىندا قىزمەت ەتەدى. بۇگىندە قازاقستاننىڭ 6 اۋەجايىنىڭ اكتسيالار پاكەتى وسى كومپانياعا باسقارۋعا بەرىلگەن. باسقارۋشى كومپانيا قولىنا بارلىعى 11 اۋەجايدى شوعىرلاندىرۋدى جوسپارلاپ وتىر.

اۆتور: ءابۋ-اسقار مەكەش ۇلى