الماتىدا 100 تومدىق «بابالار ءسوزى» اتتى قازاق فولكلورىنىڭ توپتاماسى تانىستىرىلدى
بۇل تۋرالى اتالعان مينيسترلىكتىڭ باسپا ءسوز قىزمەتى حابارلادى.
بىرەگەي باسىلىم قازاق مادەنيەتىنىڭ رۋحاني-زياتكەرلىك، كوركەمدىك تاڭعاجايىپ مۇراسىنىڭ عىلىمي اينالىمعا ءتۇسىپ، اۋىز ادەبيەتىنىڭ جاۋھارلارىمەن جۇرتشىلىقتىڭ كەڭىنەن تانىسۋىنا جول اشادى.
ۇزاق جىلدار بويى قازاق فولكلورى سەريالى تۇردە جاريالانعان جوق. قازاق ادەبيەتىنىڭ كورنەكتى وكىلدەرى ءا. بوكەيحانوۆ، ا. بايتۇرسىنوۆ، س. سەيفۋللين، م. اۋەزوۆ، ت. ب. فولكلور شىعارمالارىن ارنايى توم نەمەسە جەكە كىتاپ تۇرىندە جارىققا شىعاردى.
قازاق فولكلورىن كوپ تومدىق ەتىپ جاريالاۋ ءىسى تەك وتكەن عاسىردىڭ 80 - جىلدارى قولعا الىنعانمەن، 17 تومى عانا جارىققا شىقتى.
تاۋەلسىزدىك العاننان كەيىنگى العاشقى جىلدارى ەلىمىزدە قازاق فولكلورىن زەرتتەۋ بويىنشا جۇمىستار قولعا الىندى. پرەزيدەنتىمىز ن. نازاربايەۆتىڭ تىكەلەي باستاماسىمەن قولعا الىنعان «مادەني مۇرا» مەملەكەتتىك باعدارلاماسىنىڭ ارقاسىندا ۇلتتىق فولكلورىمىزدىڭ باسىم كوپشىلىگى ءبىرتۇتاس سەريا تۇرىندە «بابالار ءسوزى» دەگەن اتاۋمەن 100 توم كولەمىندە جارىققا شىقتى.
توپتاما عىلىمي باسىلىمداردىڭ جۇيەسىندە دايىندالعاندىقتان، جيناقتاردا نەگىزىنەن شاعاتاي، ءقادىم، توتە اراب جازۋلارى مەن لاتىن ارپىندە حاتقا تۇسكەن ماتىندەر قامتىلدى. حالىق ەپوسىنىڭ «حيكايالىق داستاندار» (13 توم)، «ءدىني داستاندار» (7 توم )، «عاشىقتىق داستاندار» (11 توم)، «تاريحي جىرلار» (11 توم)، «باتىرلار جىرى» (20 توم) سەكىلدى تۇرلەرى مەن فولكلوردىڭ «ماقال-ماتەلدەر» (5 توم)، «قارا ولەڭ» (2 توم)، «شەجىرەلىك جىر- اڭىزدار» (3 توم)، «ەرتەگىلەر» (5 توم)، «تاريحي اڭىزدار» (4 توم)، «اۋىزەكى اڭگىمەلەر» (3 توم)، «عۇرىپتىق فولكلور» (2 توم)، «ءان ولەڭدەر» (2 توم) جانە «جۇمباقتار»، «بالالار فولكلور»، «قازاق ميفتەرى»، «موڭعوليا قازاقتارىنىڭ فولكلورى»، «توپونيمدىك اڭىزدار»، «كۇي اڭىزدار» ، «اڭىزدىق شەجىرەلەر»، «اڭىزدىق جىرلار»، «وتىرىك جانە مىسالدار»، «ماگيالىق فولكلور»، «ءتۇس جورۋ جانە ىرىمدار»، «حيكاياتتار» (ءبىر-ءبىر توم) سياقتى جانرلارى تەكستولوگيالىق ساراپتاۋلاردان ءوتىپ، ءار تومنىڭ عىلىمي قوسىمشاسىندا تۇسىنىكتەمەلەر، قولجازبالار تۋرالى مالىمەتتەر، ماتىندەردە كەزدەسەتىن تاريحي، ءدىني ەسىمدەر، ماتىندەردەگى تۇسىنىكسىز ۇعىمداردىڭ سوزدىگى، جەر-سۋ اتاۋلارى، شارتتى قىسقارتىلعان سوزدەر مەن اتاۋلاردىڭ ءتىزىمى، پايدالانىلعان ادەبيەتتەر جانە تومنىڭ ورىس، اعىلشىن تىلىندەگى تۇيىندەمەسى جازىلدى.
قازىرگى تاڭدا قازاقستان ۇلتتىق بايلىقتى ءبىر جەرگە توپتاپ، جۇيەلەپ، عىلىمي شارت نەگىزىندە تەكستولوگيالىق جۇمىس جۇرگىزىپ، اكادەميالىق باسىلىم رەتىندە 100 توم ەتىپ جارىققا شىعارعان جالعىز مەملەكەت بولىپ تابىلادى.
