قىتايدا 100 گە جۋىق ادام تەرروريستەر شابۋىلىنىڭ قۇربانى بولدى

استانا. قازاقپارات - قىتايدىڭ سولتۇستىك-باتىسىنداعى شىنجاڭ-ۇيعىر اۆتونوميالى ولكەسىندە لاڭكەستىك شابۋىل سالدارىنان اجال قۇشقان ادامدار سانى 96 عا جەتتى، دەپ حابارلايدى Ifeng قىتايلىق ينتەرنەت-باسىلىمى.

ايتا كەتەيىك، پوليتسيانىڭ حابارلاۋىنشا، دۇيسەنبى كۇنى پىشاقپەن قارۋلانعان توپ شاچە ۋەزىندەگى ەليشكۋ قالاسىندا پوليتسيا ۋچاسكەسى مەن ۇكىمەتتىك مەكەمەلەرگە شابۋىل جاساعان ەدى. ولاردىڭ ەندى ءبىر توبى كورشىلەس حۋاندي قالاسىندا كوشەدەگى ادامداردى اتقىلاپ، جولدارىندا كەزىككەن اۆتوكولىكتەردى وتقا وراعان.

سەنبى كۇنى وتكەن جەرگىلىكتى پارتيا كوميتەتىنىڭ جينالىسىندا 37 بەيبىت تۇرعىندار مەن 59 شابۋىلداۋشى قۇربان بولعانى، تاعى 13 بەيبىت تۇرعىننىڭ جارالانعانى ايتىلدى. 31 كولىك زاقىمدالىپ، 6 اۆتوكولىك ورتەنگەن. پوليتسيا تەرروريستىك ارەكەتتەرگە قاتىسى بار دەگەن كۇدىكپەن 215 ادامدى تۇتقىنعا الدى.