قازاقستاندا 100 تەڭگەسى بار ازامات ءوزىنىڭ شاعىن بيزنەسىن تىركەي الادى
ەڭ باستىسى جاسى كامەلەتتىك جاسقا جەتسە ءارى ەلىمىزگە پايدا الىپ كەلەتىن تىڭ يدەياسى بولسا بولعانى.
بۇل تۋرالى «الماتى» تەلەارناسى «اشىق اڭگىمە» باعدارلاماسىندا الماتى ق. ادىلەت دەپارتامەنتىنىڭ باس مامانى نۇرالى شاحابايەۆ مالىمدەدى.
«شاعىن بيزنەس ەرەجەلەرى تەك الماتىدا عانا ەمەس، ەلىمىزدىڭ بارلىق ايماقتارىن قامتيدى. بىزدە شاعىن بيزنەستى تىركەۋدەگى ەڭ تومەنگى كاپيتال - 100 تەڭگە. ياعني، قالتاسىندا اتالعان قاراجاتى بار، كامەلەتتىك جاسقا تولعان كاسىپكەر تۇرعىلىقتى مەكەن-جايى بويىنشا حالىققا قىزمەت كورسەتۋ ورتالىعىنا بارىپ، ەلەكتروندى فورماتتا تىركەلۋىنە بولادى. 24 ساعاتتىڭ ىشىندە ادىلەت دەپارتامەنتى تىركەيدى. ول ءۇشىن ءوتىنىش تولتىرۋ قاجەت»، - دەدى شاحابايەۆ.
اتالمىش نورمانى ق ر ادىلەت مينيسترلىگى ەنگىزگەن. سول ارقىلى كەز كەلگەن ستۋدەنت نەمەسە جاس ازامات ءوزىنىڭ تىڭ يدەياسىن جۇزەگە اسىرۋ مۇمكىندىگى تۋادى.
«الماتى» تەلەارناسى
