قىتاي قازاقستاننان 100 مىڭ توننا بيداي ساتىپ الۋدى جوسپارلاۋدا

الماتى. قازاقپارات - قازاقستان مەن قىتاي حالىق رەسپۋبليكاسى اراسىندا بيداي ساۋداسى بويىنشا ءوزارا ىنتىماقتاستىق كەلىسىم جاسالدى. بۇل تۋرالى «قازاگرو» ۇلتتىق حولدينگىنىڭ باسپاءسوز قىزمەتى مالىمدەدى.

اتالعان قۇجاتقا ەكى ەلدىڭ اتىنان «قازاگرو» ۇلتتىق باسقارۋشى حولدينگى» اق باسقارما ءتوراعاسى دۋلات ايتجانوۆ پەن «كورپوراتسيا كوفكو ليميتەد» قىتاي ۇلتتىق كومپانياسىنىڭ ۆيتسە-پرەزيدەنتى جينتاۋ جي قول قويدى.

بۇل مامىلە قازاقستاندىق بيدايدىڭ كورشى ەلگە ەكسپورتتىق جەتكىزىلىمدەرىن نىعايتۋدى كوزدەپ وتىر.

«قازاگرو» ۇلتتىق حولدينگى ساۋدا سالاسىندا ىنتىماقتاستىقتى نىعايتۋ بويىنشا قىتايلىق ارىپتەستەرمەن كەلىسسوزدەردى اعىمداعى جىلدىڭ باسىنان جۇرگىزۋدە.

جۇرگىزىلگەن كەلىسسوزدەردىڭ قورىتىندىسى رەتىندە قازاقستان پرەزيدەنتى نۇرسۇلتان نازاربايەۆتىڭ 19-20-مامىر ارالىعىندا ق ح ر-نا بارعان مەملەكەتتىك ساپارى اياسىندا كەلىسىمگە قول قويىلدى.

ەكى جاقتى مامىلەگە سايكەس قىتايلىق كوفكو كورپوراتسياسى 2014-2015-جىلدارى ارالىعىندا نارىقتىق ءادىل باعامەن «قازاگرو» حولدينگى تاراپىنان 100 مىڭ توننا قازاقستاندىق بيدايدى يمپورتتاۋدى كوزدەپ وتىر.

بۇدان بولەك، ەكى ەل وكىلى ءوزارا بيداي ساۋداسى كولەمىن ارتتىرۋ ماقساتىندا عانا ەمەس، ءۇشىنشى ەلدەرگە ترانزيتتى ساۋدانى جۇزەگە اسىرۋ ءۇشىن ءبيداي تەرمينالىنىڭ قۇرىلىسىن بىرلەسە قارجىلاندىرۋ ماسەلەسىن قاراستىرۋعا ىقىلاسىن ءبىلدىردى.

«قىتاي قازاقستاندىق بيداي مەن باسقا دا ءداندى جانە مايلى داقىلدار ءۇشىن ماڭىزدى ستراتەگيالىق نارىقتاردىڭ ءبىرى بولىپ تابىلادى. قول قويىلعان كەلىسىم-ەكى ەل اراسىندا بيداي جەتكىزۋ سالاسىندا تۇراقتى ساۋدا قاتىناستارىن رەتتەۋدە العاشقى قادامداردىڭ ءبىرى»، -دەدى «قازاگرو» حولدينگى باسشىسى دۋلات ايتجانوۆ.