قورعاستان وتكەن قىتاي-ەۋروپا پويىزدارىنىڭ سانى 1000 عا جەتتى - شەتەلدەگى قازاق ءتىلدى ب ا ق-قا شولۋ
يران قازاقستاننىڭ تاۋ-كەن سالاسىنا ينۆەستيسيا سالۋعا دايىن - Parstoday
يراننىڭ ساۋدا، كەن جانە ونەركاسىپ ءمينيسترىنىڭ ورىنباسارى ۆادجيحۋللا دجافاري يراننىڭ قازاقستاندا تەمىر، بوكسيت، قورعاسىن مەن مىرىش كەن ورىندارىنا ينۆەستيسيا سالۋعا دايىن ەكەنىن مالىمدەدى، دەپ حابارلايدى Parstoday اقپاراتتىق اگەنتتىگى.
اتالعان ب ا ق- تىڭ مالىمەتىنشە، ۆادجيحۋللا دجافاري تەھراندا قازاقستاننىڭ يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى رۋسلان بايميشەۆپەن كەزدەسۋىندە ەكى ەلدىڭ تاۋ-كەن ونەركاسىبىنە قاتىستى مەموراندۋمدارىنا توقتالعان.
سول كەزدەسۋدە ۆادجيحۋللا دجافاري ەكى ەل اراسىنداعى ىنتىماقتاستىق قۇجاتتارى تاراپتاردىڭ ءجىتى باقىلاۋىن قاجەت ەتەدى. سول سەبەپتى مەموراندۋمداردى قايتا قاراستىرىپ، كەلەشەك ارىپتەستىكتىڭ نەگىزى ەتىپ الۋ كەرەك ەكەنىن تىلگە تيەك ەتكەن. ۆادجيحۋللا دجافاري قازاقستاندىق باسشىعا ءوز ۇسىنىستارىن ايتقان. ونىڭ ايتۋىنشا، يراندىق كومپانيالار قازاقستاننىڭ «شاكيا» قورعاسىن مەن مىرىش كەن ورنىندا وڭدەۋ زاۋىتىن سالۋعا ينۆەستيتسيا قۇيعىسى كەلەدى. سونداي- اق يراندىق ۆيتسە- مينيستر ماماندار جينالىسىندا بۇل ماسەلە كەڭىرەك تالقىلاناتىنىن تىلگە تيەك ەتكەن.
تاشكەنتتە «ناۋاي جانە قازاق ادەبيەتى»، «قاردوشلار» اتتى كىتاپتىڭ تۇساۋكەسەرى ءوتتى - «ءوزا»
23-اقپاندا وزبەكستان جازۋشىلار وداعىندا بەلگىلى ادەبيەتتانۋشى عالىم، اكادەميك، جازۋشى، اقىن، اۋدارماشى جانە قوعام قايراتكەرى، وزبەكستاندا قىزمەت كورسەتكەن مادەنيەت قايراتكەرى قالدىبەك سەيدانوۆتىڭ 80 جىلدىعىنا ارنالعان «ناۋاي جانە قازاق ادەبيەتى» جانە «قاردوشلار» اتتى كىتاپتارىنىڭ تۇساۋكەسەرى ءوتتى، دەپ حابارلادى «ءوزا» مەملەكەتتىك اقپارات اگەنتتىگى.
وزبەكستاندىق ب ا ق-تىڭ مالىمەتىنشە، قالدىبەك سەيدانوۆتىڭ «ناۋاي جانە قازاق ادەبيەتى» اتتى زەرتتەۋ ەڭبەگى ءۇش بولىمنەن تۇراتىن بولىپ، العاشقى ءبولىم «قازاق- وزبەك ادەبي بايلانىسى تۋرالى» باۋىرلاس وزبەك پەن قازاق حالىقتارىنىڭ ادەبي بايلانىستارى جونىندە جازىلعان. «ءتول ءسوزدىڭ اتاسى» اتتى ەكىنشى بولىمدە ءسوز قاسيەتى سۇلتانىنىڭ ءومىرى مەن پوەزياسى باياندالعان. سونداي-اق «ناۋاي جانە قازاق ادەبيەتى»، «ناۋاي جانە اباي» اتتى ءۇشىنشى تاراۋدا ۇلى شايىردىڭ قازاق اقىندارىنىڭ، اتاپ ايتقاندا، قازاق ادەبيەتىنىڭ نەگىزىن قالاۋشى ابايعا اسەرى تۋرالى وي- پىكىرلەرى ءسوز بولادى. اتالعان تۋىندى «ادابيەت» باسپاسىنان 1000 دانامەن جارىق كورگەن.
ايتا كەتەيىك، قالدىبەك سەيدانوۆتىڭ «قاردوشلار» اتتى كىتابىندا قازاق پەن وزبەك حالىقتارىنىڭ دوستىعى، ادەبي-مادەني بايلانىستارى تۋرالى جازىلعان. كىتاپ «قازاق- وزبەك ادەبي بايلانىستارىنىڭ تاريحىنان» جانە « ⅩⅩ عاسىرداعى وزبەك- قازاق ادەبي بايلانىستارى تاريحىنا كوزقاراس» دەگەن ەكى بولىمنەن تۇرادى. بۇل كىتاپ 2021 -جىلى «تافاككۋر» باسپاسىنان 500 دانامەن جارىق كورگەن بولاتىن. وزبەكستان جازۋشىلار وداعى جانە وزبەكستانداعى قازاقستان ەلشىلىگىنىڭ قولداۋىمەن وتكەن شارادا قازاقستان ەلشىلىگى قالامگەردى مەرەيتويىمەن قۇتتىقتاپ «قازاقستان رەسپۋبليكاسى تاۋەلسىزدىگىنىڭ 30 جىلدىعى قۇرمەتىنە ارنالعان مەرەكەلىك مەدالدى» تابىس ەتتى.
«وزبەكستان جازۋشىلار وداعىنىڭ مۇشەسى، جاس اۋدارماشى ءتۇرسىنالى احمەتوۆ جۇرگىزگەن ايتۋلى شاراعا، وزبەكستان جازۋشىلار وداعى ءتوراعاسىنىڭ ورىنباسارى عايرات ماجيت، وزبەكستانداعى قازاقستان ەلشىسىنىڭ كەڭەسشىسى رۋسلان دۋيسەنوۆ پەن وزبەكستانداعى قازاق جانە وزبەك قالامگەرلەرى، قوعام قايراتكەرلەرى قاتىستى»، دەپ تۇيىندەيدى «ءوزا» مەملەكەتتىك اقپارات اگەنتتىگى.
قورعاستان وتكەن قىتاي-ەۋروپا پويىزدارىنىڭ سانى 1000 عا جەتتى - «حالىق گازەتى»
شىڭجاڭنىڭ «قورعاس» تەمىر جول ۆوكزالىنان العان اقپاراتىنا سايكەس، 23-اقپانعا دەيىن اتالعان ۆوكزالداعى قىتاي- ەۋروپا پويىزدارىنىڭ بيىلعا دەيىنگى سانى 1000-عا جەتكەن.
23-اقپان كۇنى ستاندارتتى قوراپقا كۇندەلىكتى تۇرمىسقا قاجەتتى زاتتار، تۇرمىستىق تەحنيكا جانە مەحانيكالىق بولشەكتەردى تيەگەن قىتاي- ەۋروپا كونتەينەرلىك پويىزى «قورعاس» تەمىر جول ۆوكزالى ارقىلى قىتايدان شىققان. جىجياڭ قالاسىنان جولعا شىققان بۇل پويىز قازاقستان ارقىلى وزبەكستاننىڭ تاشكەنت قالاسىنا بارادى. بۇل «قورعاس» ۆوكزالى ارقىلى وتەتىن قىتاي- ەۋروپا باعىتىنداعى 1000-پويىز.
بۇل تۋرالى وسى اپتادا قىتايدىڭ «حالىق گازەتى» اقپاراتتىق پورتالى حابارلاعان بولاتىن.
اتالعان ب ا ق-تىڭ دەرەگىنشە، قىتايدىڭ «قورعاس» تەمىرجول ۆوكزالى پايدالانۋدى باسقارۋ ءبولىمىنىڭ ەكونوميست كومەكشىسى چەن كايتسيان تاسىمال ۇيىمداستىرۋىن جالعاستىرىپ جاتقانىن، قايتار جولدا الاتىن تاۋار كوزىن كەڭەيتۋمەن بىرگە ۆوكزال جۇمىسىن تەزدەتكەنىن ايتتى. سونداي- اق، چەن كايتسياننىڭ ايتۋىنشا، قىتاي-ەۋروپا جۇك پويىزىنىڭ پلاتفورماسىنا سۇيەنە وتىرىپ مۋلتيمودالدى جاقسارتىلدى، كەدەندىك رەسىمدەۋ پروتسەسى وڭتايلاندىرىپ، كەدەننەن ءوتۋ ۋاقىتى قىسقارعان.
سونىمەن قاتار، «قازاقستان تەمىر جولى» كومپانياسىمەن ۇيلەستىرۋ مەن بايلانىس نىعايىپ، پويىزدار قوزعالىسىنىڭ ساپاسى مەن تيىمدىلىگى ارتقان. قىتايلىق باق- تىڭ كەلتىرگەن دەرەگىنە سۇيەنسەك، 2016 -جىلدىڭ ناۋرىز ايىندا قىتاي- ەۋروپا اراسىنداعى العاشقى پويىزدىڭ قاتىناۋىنان باستاپ قىتايلىق «قورعاس» تەمىرجول ۆوكزالى 18 ەل مەن 45 قالانى، سونىڭ ىشىندە گەرمانيا، پولشا، تۇركيا، رەسەي جانە ت. ب. توراپتى قامتيتىن 29 تۇراقتى جەلىسى بار حالىقارالىق لوگيستيكالىق قىزمەتكە اينالعان.
بارس اۋقات ۇلى: «الاش موڭعوليا» جاستار ۇيىمىنىڭ اشىلۋىنا جاستاردىڭ سۇرانىسى تۇرتكى بولدى - Kaznews
موڭعوليالىق Kaznews اقپارات اگەنتتىگى «جاڭا ەسىم» باعدارلاماسىنىڭ كەزەكتى قوناعى «الاش موڭعوليا» جاستار ۇيىمىنىڭ باسقارما مۇشەسى بارس اۋقات ۇلىمەن بولعان قىسقاشا سۇحباتتى ۇسىندى.
اۋەلدە سپيكەر «الاش موڭعوليا» جاستار ۇيىمىن اشۋعا نە تۇرتكى بولدى؟ وزگە ۇيىمداردان ەرەكشەلىگى نەدە؟» دەگەن دەگەن سۇراققا جاۋاپ بەردى.
بارس اۋقات ۇلىنىڭ ايتۋىنشا، اتالعان ۇيىمنىڭ اشىلۋىنا باستى سەبەپ ول جاستاردىڭ سۇرانىسى تۇرتكى بولعان كورىنەدى.
«ويتكەنى ءاربىر ستۋدەنت ءوزىن دامىتۋعا لايىق ورتا دا بولۋدى قالادى، ىزدەدى! سوسىن اقىرىنداپ باسقوسۋلار بولا باستادى. ءبىز «بىرگە تالاپتانىپ، بىرگە داميىق» - دەگەن ۇندەۋمەن ۇيىمنىڭ نەگىزىن قالادىق»، دەيدى «الاش موڭعوليا» جاستار ۇيىمىنىڭ باسقارما مۇشەسى ب. اۋقات ۇلى.
ايتا كەتەيىك، اتالعان ۇيىمعا دومبىراشى، ءانشى، جانە سازگەر ورازبەك سەيىتاحمەت ۇلى ءتوراعالىق ەتەدى ەكەن.
ول 2018 -جىلى ۇيىمنىڭ ىرگەسىن قالاعانداردىڭ ءبىرى. و. سەيىتاحمەت ۇلى 2019 -جىلى IT ماماندىعىمەن ءتامامداعان. بۇگىنگى تاڭدا مەمەلەكەتتىك باسقارۋ اكادەمياسىندا قىزمەت اتقارادى.
موڭعوليالىق ب ا ق- تىڭ دەرەگىنشە، «الاش موڭعوليا» جاستار ۇيىمىنىڭ نەگىزگى ماقساتى - ءبىلىمدى، ۇلتتىق قۇندىلىقتاردى ساقتاعان، وتان سۇيگىش، رۋحاني دۇنيەسى باي جاستاردى تاربيەلەۋگە كۇش سالۋ. سونىمەن قاتار، جاستارعا ەڭ اۋەلى تاربيە، سوسىن ءبىلىم ءبىلۋ ماڭىزدى ەكەنىن كوپشىلىكتىڭ نازارىنا ۇسىنۋ. سونداي-اق، ۇيىمنىڭ تاعى ءبىر ماقساتى - ونەر جولىنا تالپىنعان كەيىنگى جەتكىنشەكتەرگە قولداۋ كورسەتۋ.
اۆتور: بەيسەن سۇلتان ۇلى
