ۋنيۆەرسيادا سپورت نىساندارىنىڭ اشىلۋى الماتىنىڭ 1000 جىلدىعىن مەرەكەلەۋگە ورايلاستىرىلادى
«ۋنيۆەرسيادا» باسشىلىعىنىڭ مالىمەتى بويىنشا بارلىق سپورت نىساندارى 2016 - جىلدىڭ 30 - تامىزىندا پايدالانۋعا بەرىلەدى.
قازىر تەڭگە باعامىنىڭ وزگەرۋىنە قاراماستان قۇرىلىس جۇمىستارى قارقىندى تۇردە جۇرگىزىلىپ جاتىر جانە بەلگىلەنگەن مەرزىمدە اياقتالادى. مىسالى، ۇستىمىزدەگى جىلدىڭ 22 - ناۋرىزىندا مەدەۋ اۋدانىنداعى 3000 ورىندىق مۇز ارەناسىنىڭ جاتتىعۋ ايدىنى دايىن بولادى، ال 6 - شىلدەدە نەگىزگى ارەنا مەن اكىمشىلىك عيماراتتىڭ قۇرىلىسى اياقتالىپ، نىساننىڭ اينالاسى اباتتاندىرىلادى. بۇلاردان وزگە، 12 مىڭ ورىندىق مۇز سارايىنىڭ اكىمشىلىك عيماراتىنىڭ، وسىنداعى باسسەين مەن جاتتىعۋ مۇز ايدىنىنىڭ قۇرىلىس- مونتاج جۇمىستارى تولىق اياقتالىپ، نىساننىڭ نەگىزگى بلوگى 2016 -جىلدىڭ 9 - مامىرىندا پايدالانۋعا بەرىلەدى، ال نىساننىڭ اينالاسىن اباتتاندىرۋ جۇمىستارى 6 - شىلدەدە اياقتالادى. اتلەتتەر اۋىلىنداعى 5 مىڭ ورىندىق 4 تۇرعىن ءۇي 22 - ناۋرىزدا بەرىلسە، تاعى 4 تۇرعىن ءۇي 9 - مامىردا ىسكە قوسىلادى. ال 6 - شىلدەدە سوڭعى 2 تۇرعىن ءۇيدىڭ قۇرىلىسى اياقتالادى. بۇلاردىڭ اينالاسىن كوگالداندىرۋ مەن اباتتاندىرۋ جۇمىستارى 1 - تامىزدا جۇزەگە اسادى. بارلىق نىسانداردىڭ قۇرىلىس- مونتاج جۇمىستارى تامىزدىڭ سوڭىندا اياقتالىپ، بيىلعى جىلدىڭ 30 - تامىزىندا پايدالانۋعا بەرىلەدى. قۇرىلىستىڭ ءار كەزەڭى الماتى اكىمى ب. بايبەكتىڭ جەكە باقىلاۋىنا الىنعان.
ەستەرىڭىزگە سالا كەتەيىك، تاياۋدا عانا 12 مىڭ ورىندىق مۇز سارايىنىڭ كىشى ارەناسىنىڭ، جاڭا باسسەيننىڭ، ۋنيۆەرسيادا سپورت نىساندارى مەن اتلەتتەر اۋىلىنىڭ بيزنەس- مۇمكىندىكتەرىنىڭ تۇساۋكەسەرى وتكەن بولاتىن. بۇل شاراعا قالا اكىمى باۋىرجان بايبەك، سپورتشىلار، بيزنەسمەندەر، جۋرناليستەر، بلوگەرلەر جانە باسقا دا مۇددەلى تۇلعالار قاتىستى.
اۆتور: جاپپاربەرگەن ايبوتا
