استانالىق كاسىپكەرلەرگە كوشە ساۋداسى ءۇشىن 1000 ورىن ۇسىنىلادى
وسىعان وراي، استانادا كاسىپكەرلەرگە كوشەدەگى ساۋدا ءۇشىن 1000 ورىن ۇسىنىلاتىن بولادى. بۇل تۋرالى استانا قالالىق كاسىپكەرلەر پالاتاسىنىڭ باسپا ءسوز قىزمەتىنەن حابارلاندى.
ەسكە سالا كەتەرلىگى، قالا اكىمدىگى اعىمداعى جىلى كوشەدەگى ساۋدانى جۇزەگە اسىرۋعا 247 ورىن بولگەن بولاتىن. الايدا، كاسىپكەرلەر ۇسىنىلعان ورىنداردىڭ جەتكىلىكسىزدىگىن العا تارتقان ەدى. سونىمەن قاتار، شاعىن جانە ورتا بيزنەس سۋبەكتىلەرىنىڭ كوپتەگەن شاعىمدارىنان سوڭ قالالىق كاسىپكەرلەر پالاتاسى اتالعان ماسەلەنى جەرگىلىكتى ورگان وكىلدەرىنىڭ قاتىسۋىمەن وتكەن كاسىپكەرلەر قۇقىعىن قورعاۋ كەڭەسىندە تالقىلاعان بولاتىن.
«ناتيجەسىندە استانا قالاسى كاسىپكەرلىكتى جانە ونەركاسىپتى دامىتۋ باسقارماسىنىڭ وكىلدەرى «Astana» الەۋمەتتىك-كاسىپكەرلىك كورپوراتسياسى» كومپانياسىمەن بىرلەسە وتىرىپ، كوشە ساۋداسى نىساندارىن دامىتۋ ءۇشىن ارنايى باعدارلاما ازىرلەدى. وسىعان بايلانىستى، كوشەدەگى ساۋدا ءۇشىن كاسىپكەرلەرگە 1000 ورىن بولىنەتىنى بەلگىلى بولدى. ال ول ورىندار تۋرالى ناقتى اقپاراتتى استانا قالالىق ساۋلەت جانە قالا قۇرىلىسى باسقارماسىنىڭ سايتىنان كورە الادى»، - دەلىنگەن باسپا ءسوز بايانىندا.
«بۇل ورىندار بويىنشا ناقتى جەرى بەلگىلەنەدى، سوسىن ساۋدا قىزمەتىنىڭ ءتۇرى، ورىندار سانى مەن نىساننىڭ مەكەنجايى كورسەتىلەدى. بۇل رەتتە بارلىق ساۋدا نۇكتەلەرى قالانىڭ ساۋلەت كەلبەتىنە، بارلىق سانيتارلىق جانە ورتكە قارسى تالاپتارعا ساي بولۋى كەرەك»، - دەيدى استانا قالاسى اكىمدىگى كاسىپكەرلىك جانە ونەركاسىپ باسقارماسى باسشىسىنىڭ ورىنباسارى رىسكۇل قاۋعابايەۆا.
ەسكەرتە كەتەتىن جايت، كوشە ساۋدالارىنا ءموبيلدى كوفەينيا، جىلجىمالى اۆتوسەرۆيس، نان جانە جەمىس-جيدەك دۇڭگىرشىكتەرى، گۇل جانە كادەسىي دۇكەندەرى، سونداي-اق ستريت-فۋدتار جاتقىزىلعان.
اۆتور: قانات مامەتقازى ۇلى
