قۇرمانعازى اۋدانىنداعى شارۋا قوجالىعى تاۋلىگىنە 1000 قوراپشا قوسپاسىز ءتۇشپارا شىعارادى
جەرگىلىكتى جەردە دايىندالاتىن تابيعي تازا تاعام تۇرلەرى اۋىلداستارى تاراپىنان وڭ باعاعا يە بولعان. العا اۋىلىنداعى وسى ءبىر شاعىن دۇكەننەن ادام قاراسى ۇزىلگەن ەمەس. سەبەبى مۇندا ۇنەمى تابيعي تازا ەت ونىمدەرى ساتىلادى.
شاعىن تۇشپارا سەحى تاۋلىگىنە 30 كەلى ەت وڭدەپ، ءبىر مىڭ قوراپشا تۇشپارا شىعارادى. ول مىڭ جارىمداي تۇرعىنى بار اۋىلدى عانا ەمەس، اۋداندى قامتۋعا جەتىپ تۇر. ءوز اۋىلىنان اشىلعان كاسىپورىننىڭ تىرلىگىنە تۇتىنۋشىلارى ءدان ريزا.
رەسەيدىڭ استراحان وبلىسى العا اۋىلىنان تاياق تاستام جەردە ورنالاسقان. نارىق ورتاق بولعاندىقتان مۇندا ازىق- تۇلىك ونىمدەرى اراسىندا باسەكەلەستىك وتە كۇشتى. شەكارا اشىلعالى كورشى ەلدىڭ كاسىپكەرلەرى اۋىل جاعالاپ ءوز تاۋارىن تىقپالاۋدى ادەتكە اينالدىرعان. سوندىقتان ءبىز ءونىم ساپاسىن باستى نازاردا ۇستايمىز، - دەيدى اۋىل بيزنەسىنىڭ وكىلدەرى.
گۇلدەن بوياروۆا، تۇشپارا سەحىنىڭ تەحنولوگ:
- تۇشپارامىز سيىر ەتىنەن جاسالادى. ىشىنە پياز بەن ماي قوسامىز. باسقا ەشقانداي قوسپا جوق. تازا ءونىم. شاعىن سەح اۋىلداعى «قۇباش» شارۋا قوجالىنىڭ ەنشىلەس كاسىپورنى. شارۋاشىلىق اۋدان تۇرعىندارىن تۇشپارا عانا ەمەس ەت ونىمدەرىممەن دە قامتىپ وتىر. سونىمەن قاتار بالاباقشالار مەن مەكتەپتەردى دە ارزان ءارى ساپالى ونىممەن قامتامسىز ەتەدى.
ەسبولات قۇباشيەۆ، شارۋاشىلىق جەتەكشىسى:
- جىلىنا 20 توننا سيىردىڭ تازا ەتىن ءوندىرىپ جاتىرمىز. وسى ءونىمىمىزدى العا قاراي كەڭەيتىپ، تۇشپارا جاساپ، قالبىرعا ەت سالىپ وسى ارادا حالىقتى جۇمىسپەن قامتىپ، وسى اۋىلدىڭ وركەندەۋىنە جۇمىس جاساي بەرگىمىز كەلەدى.
«قۇباش» شارۋا قوجالىعىندا بۇرىن 200 باسقا دەيىن ءىرى قارا باعىلاتىن. وتكەن جىلى «سىباعا» باعدارلاماسىنىڭ كومەگىمەن قوسىمشا 300 باس قازاقتىڭ اقباس سيىرىن الدى. مەملەكەت قولداۋىنا سۇيەنگەن شارۋا ەندى مال باسىن تاعى دا كوبەيتىپ، ءوندىرىس كولەمىن ارتتىرۋعا قام جاساۋدا. زاماناۋي تەحنولوگياعا نەگىزدەلگەن ەت وڭدەۋ سەحىنىڭ دا قۇرىلىسى ءجۇرىپ جاتىر. ءوندىرىستىڭ ەكىنشى كەزەڭى ىسكە قوسىلعاندا ءونىم كولەمى 4-5 ەسە ارتاتىن بولادى. سايكەسىنشە، جۇمىسشى سانى دا قازىرگى 35 تەن 70 ادامعا جەتكىزىلمەك.
