مۇگەدەكتىگى بار بالاسىنا كۇتىم كورسەتەتىن 100,8 مىڭ ادام جاردەماقى الادى
بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءماجىلىس دەپۋتاتتارىنىڭ ساۋالىنا بەرگەن جاۋابىندا ءمالىم ەتتى، دەپ حابارلايدى قازاقپارات ءتىلشىسى.
«2010-جىلدان باستاپ مۇگەدەكتىگى بار بالا اسىراپ وتىرعان وتباسىلاردى قولداۋ ءۇشىن اناسىنا نەمەسە اكەسىنە، بالا اسىراپ الۋشىعا، قورعانشىعا (قامقورشىعا) اي سايىنعى مەملەكەتتىك جاردەماقى ەنگىزىلگەن. ول وتباسىنىڭ تابىسى ەسەپكە الىنباي تولەنەدى. ال 2018-جىلعى 1- شىلدەدەن باستاپ 18 جاستان اسقان ءبىرىنشى توپتاعى مۇگەدەكتىگى بار ادامعا كۇتىم جاسايتىن ادامدار ءۇشىن اي سايىنعى مەملەكەتتىك جاردەماقى كوزدەلگەن. جاردەماقى مولشەرى ءتيىستى جىلعا ارنالعان رەسپۋبليكالىق بيۋجەت تۋرالى زاڭدا بەلگىلەنگەن ەڭ تومەنگى كۇنكورىس دەڭگەيىنە سايكەس يندەكستەلەدى (2023-جىلى - 56794 تەڭگە).
جىل باسىنان بەرى جاردەماقى الۋشىلار سانى ورتا ەسەپپەن 100876 ادامدى قۇرادى. رەسپۋبليكالىق بيۋجەتتەن 17,5 ميلليارد تەڭگە تولەندى»، - دەپ جازىلعان جاۋاپتا.
ءمينيستردىڭ مالىمەتى بويىنشا، حالىقتى الەۋمەتتىك قورعاۋ سالاسىندا مۇگەدەكتىگى بار ادامدارعا تۋىنداعان الەۋمەتتىك پروبلەمالاردى شەشۋ جانە قوعام ومىرىنە تەڭ جاعدايلاردا قاتىسۋ مۇمكىندىكتەرىن قالىپتاستىرۋ ءۇشىن ارنايى الەۋمەتتىك قىزمەتتەر قاراستىرىلعان. ولار: الەۋمەتتىك- تۇرمىستىق، الەۋمەتتىك-مەديتسينالىق، الەۋمەتتىك-پسيحولوگيالىق، الەۋمەتتىك-پەداگوگيكالىق، الەۋمەتتىك-ەڭبەك، الەۋمەتتىكمادەني، الەۋمەتتىك-ەكونوميكالىق، الەۋمەتتىك-قۇقىقتىق قىزمەتتەر) ستاتسيونار، 3 جارتىلاي ستاتسيونار (كۇندىزگى بولۋ بولىمشەلەرى، وڭالتۋ ورتالىقتارى.
«بۇگىنگى تاڭدا رەسپۋبليكا بويىنشا مەملەكەتتىك سەكتوردا وسىنداي 85 بولىمشە جانە مەملەكەتتىك ەمەس سەكتوردىڭ 121 بولىمشەسى جۇمىس ىستەيدى. قابىلدانعان شارالار وتباسى قۇرامىندا مۇگەدەكتىگى بار ادامدارى بار اتا-انالارعا (قامقورشىلارعا) وتباسىلىق داستۇرلەردى، سونداي-اق قارتايعاندا لايىقتى (قامتاماسىز ەتىلگەن) ءومىردى نىعايتۋعا ىقپال ەتەدى. بۇدان ءارى بالالى وتباسىلاردى، ونىڭ ىشىندە مۇگەدەكتىگى بار وتباسىلاردى قولداۋدىڭ قولدانىستاعى جۇيەسى ەلدىڭ ەكونوميكالىق مۇمكىندىكتەرىن ەسكەرە وتىرىپ جەتىلدىرىلەدى»، - دەلىنگەن جاۋاپتا.
