10 ميلليون تەڭگە كوتەرمە اقى: 80 گە جۋىق دارىگەر جەتىسۋ وبلىسىنا قونىس اۋدارماق
تالدىقورعان. KAZINFORM - جەتىسۋ وبلىسىندا مەديتسينالىق كادرلاردىڭ تاپشىلىعى پروبلەماسىن شەشۋ ءۇشىن بيىلدان باستاپ كوتەرمە اقى تولەنەدى.
ەندى وڭىرگە كەلگەن دارىگەرلەر اۋىلدىق جەردە جۇمىس ىستەيتىن بولسا، 10 ميلليون تەڭگەدەن جانە قالادا جۇمىس ىستەگەن جاعدايدا 5 ميلليون تەڭگەدەن الادى. دەنساۋلىق ساقتاۋ باسقارماسىنىڭ حابارلاۋىنشا، وتكەن جىلى وڭىردە دارىگەرلىك كادرلاردىڭ تاپشىلىعى %8 عا تومەندەگەن. بۇل تۋرالى وبلىس اكىمىنىڭ باسپا ءسوز قىزمەتى مالىمدەدى.
جىل باسىنان بەرى وبلىسقا 76 مامان كەلگەن.
- وبلىس اكىمى بەيبىت يسابايەۆتىڭ باستاماسىمەن وبلىسىمىزعا كاسىبي مەديتسينالىق كادرلاردى تارتۋ ءۇشىن ءبىرجولعى كوتەرمە اقى تولەۋ تۋرالى شەشىم قابىلداندى. بيىل وسى ماقساتقا 595 ميلليون تەڭگە ءبولىندى. وسى كەزەڭدە اۋىلدىق جەرلەرگە كەلگەن 9 دارىگەرگە 10 ميلليون. تەڭگەدەن، ال، قالاعا كەلگەن 16 دارىگەرگە 5 ميلليون تەڭگەدەن تولەندى. بيىلعى شىلدەدەن قازانعا دەيىن جۇمىسقا قابىلدانعان تاعى 45 دارىگەرگە جىل سوڭىنا دەيىن كوتەرمە اقى تولەۋدى جوسپارلاپ وتىرمىز. بۇل قولداۋدى 3 ايلىق سىناق مەرزىمىنەن ءساتتى وتكەن جاعدايدا الۋعا بولاتىندىعىن اتاپ وتەمىن. ءوڭىردىڭ مەديتسينالىق مەكەمەسىندە 5 جىل جۇمىس ىستەۋ قاجەت. بۇل كەزەڭدە بىزگە 186 مامان جەتىسپەيدى، جىل سوڭىنا دەيىن ولاردىڭ سانى ازايادى. بۇل رەتتە بۇل ماسەلەنى شەشۋ ءۇشىن ءبىرجولعى كوتەرمە اقى تولەۋ جاقسى دەمەۋ بولىپ تابىلادى، - دەدى وبلىستىق دەنساۋلىق ساقتاۋ باسقارماسىنىڭ باسشىسى ارمان جانسەڭگىروۆ.
ايتا كەتەيىك، جىل سايىن وبلىسقا 80 گە جۋىق جاس مامان كەلەدى. سولاردىڭ ءبىرى - 17 -جىلدىق ەڭبەك ءوتىلى بار حيرۋرگ نۇرمۇحامەد بايجانوۆ، ول قابانباي اۋىلىنداعى الاكول اۋداندىق ورتالىق اۋرۋحاناسىنىڭ بولىمشەسىنە جۇمىسقا كەلگەن. ول اۋىلدىق اۋرۋحاناعا جۇمىسقا 6 اي بۇرىن كەلىپ، قولداۋ رەتىندە 10 ميلليون تەڭگە كولەمىندە كوتەرمە اقى العان. جەرگىلىكتى اكىمدىك ونىڭ وتباسىن قاجەتتى تۇرعىن ۇيمەن قامتاماسىز ەتتى.
- ارينە، جۇمىس ىستەۋ وڭاي ەمەس، كىشىگىرىم جاراقاتتاردى قوسپاعاندا، كۇنىنە 2-3 كۇردەلى وتا جاسالادى. ءبىراق، ءبىز، دارىگەرلەر بۇل جولدى ءوزىمىز تاڭدادىق. ءبىزدىڭ باستى مىندەتىمىز - ادامدارعا كومەكتەسۋ. بالالاردىڭ اۋىر جاراقاتتارمەن تۇسكەن كۇردەلى جاعدايلار دا بولدى، ونداي ساتتە مينۋتتىڭ ءوزى ماڭىزدى. بارلىق جاۋاپكەرشىلىكتى وزىڭە الاسىڭ. مەندە 4 سەرتيفيكات بار. ءوزىم جالپى ەرەسەك، جالپى بالالار حيرۋرگىمىن، بالالار تراۆماتولوگىمىن، بالالار ورتوپەدىمىن، بالالار ۋرولوگىمىن. سوندىقتان، ەمشەكتەگى سابيلەرگە دەيىن ءارتۇرلى وپەراتسيالار جاساي الامىن. بولىمدە لاپاروسكوپ بار ەكەندىگى قۋانتادى، بۇل بارلىق اۋرۋحانالاردا بولا بەرمەيدى. ال، زاماناۋي مەديتسينالىق جابدىقتى پايدالانۋ جۇمىستى بىرنەشە ەسە جەڭىلدەتەدى، وپەراتسيادان كەيىن ناۋقاستىڭ قالپىنا كەلتىرۋ پروتسەسىن جەدەلدەتەدى، - دەيدى مامان.
الاكول و ا ا ديرەكتورىنىڭ ورىنباسارى ەلميرا سەرىكوۆانىڭ ايتۋىنشا، 5 جاڭا مامان باعدارلاما بويىنشا قابىلداندى، ولارعا 10 ميلليون تەڭگەدەن تولەندى. اتاپ ايتساق، 2 حيرۋرگ، 2 رەانيماتولوگ جانە اكۋشەر- گينەكولوگ.
سونداي-اق، وڭىردە مەديتسينالىق كادرلار تاپشىلىعى پروبلەماسىن شەشۋمەن قاتار، دەنساۋلىق ساقتاۋ ينفراقۇرىلىمىن دامىتۋ بويىنشا شارالار قابىلدانىپ جاتقانىن اتاپ وتكەن ءجون. اتاپ ايتقاندا، 2024 -جىلدىڭ سوڭىنا دەيىن العاشقى مەديتسينالىق- سانيتارلىق كومەك نىساندارى 94 اۋىلدا پايدالانۋعا بەرىلەدى، ونىڭ ىشىندە 3 - جاڭا قۇرىلىس، 27 - بلوكتى- مودۋلدىك مەديتسينالىق پۋنكتتەر، 59 - «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە، تاعى 5 ەۋى كۇردەلى جوندەۋدەن وتەدى.
جەتىسۋ وبلىسىندا قابىلدانىپ جاتقان شارالاردىڭ ناتيجەسىندە 261 دەنساۋلىق ساقتاۋ نىسانىنىڭ 136 سى جاڭارتىلادى، جاڭارتۋ دەڭگەيى %52 دى قۇرايدى.
