10 جىلعا سوتتالعان قۋاندىق بيشىمبايەۆتى بوساتىپ جىبەرگەن پرەزيدەنتتىك كوميسسيا قازىر جوق - ابزال قۇسپان
ءماجىلىس دەپۋتاتى، زاڭگەر ابزال قۇسپان ادىلەت مينيسترلىگى ۇيىمداستىرعان حالىقارالىق كونفەرەنسيا الدىندا ب ا ق وكىلدەرىنە ەكس-شەنەۋنىك قۋاندىق بيشىمبايەۆتىڭ ءىسى تۋرالى پىكىر ءبىلدىردى، دەپ حابارلايدى Kazinform.
«كەيىنگى كەزدە راقىمشىلىق ارقىلى بوساپ شىققان ادامدار ورەسكەل قىلمىستار جاساپ جاتىر. ءماجىلىس دەپۋتاتى رەتىندە راقىمشىلىق تەتىكتەرىن جەتىلدىرۋ باعىتىندا جۇمىس ىستەپ جاتىرسىزدار ما؟» دەپ سۇرادى جۋرناليست.
دەپۋتاتتىڭ ايتۋىنشا، بيشىمبايەۆقا جاسالعان راقىمشىلىق - «ەسكى قازاقستاننىڭ» اتريبۋتى.
«بۇل ماسەلەنىڭ جالپى سيپاتىنا نازار اۋدارتقىم كەلەدى. ءبىز مىنا قىلمىستىق زاڭنامانى جان-جاقتان جۇلقىلاپ، نەشە ءتۇرلى وزگەرىستەر مەن تولىقتىرۋلار ەنگىزىپ، نەشە ءتۇرلى ەكسپەريمەنت جاساپ، ويىنشىققا اينالدىرىپ جىبەردىك. سوناۋ ورتا عاسىرلاردان بەرى كەلە جاتقان ۇستانىم بار. زاڭنىڭ ىسىنە ساياساتكەرلەر ارالاسسا، زاڭنىڭ ەشقانداي سالماعى، ءمانى مەن ماعىناسى قالمايدى. ق. بيشىمبايەۆقا قاتىستى ءسىز ايتىپ وتىرعان ماسەلەنىڭ راقىمشىلىققا ەشقانداي قاتىسى جوق. ول كەزدەگى ەسكى قازاقستاندا پرەزيدەنتتىڭ جانىندا اقتايتىن ارنايى كوميسسيا بولدى. ياعني، ول سوتتان دا، باسقادان دا جوعارى تۇراتىن ورگان سياقتى ەدى. سوت ءوز ۇكىمىن شىعارىپ، 10 جىلعا باس بوستاندىعىنان ايىرعان. سول ۇكىم كۇشىنە ەنىپ، جازاسىن وتەپ جاتقان كەزدە مەنىڭ بىلۋىمشە، پرەزيدەنت جانىنداعى كوميسسيانىڭ شەشىمى بويىنشا پرەزيدەنت تاراپىنان راقىمشىلىق جاريالانىپ، بوساپ شىققان بولاتىن. ياعني، ول جەردە ەشقانداي سوت بولمايدى، پروكۋرور قاتىسپايدى، ادۆوكاتتار قاتىسپايدى، سوت ءجارىسسوزى بولمايدى دەگەن سياقتى. ءبىر عانا ادامنىڭ شەشىمى. ونىڭ ارتى ەندى قانداي سالدارعا اكەپ سوققانىن وزدەرىڭىز كورىپ وتىرسىزدار»، - دەيدى دەپۋتات.
زاڭگەر قازىر پرەزيدەنت جانىندا ونداي كوميسسيا جۇمىس ىستەمەيتىنىن دە اتاپ ءوتتى.
«مەنىڭ بىلۋىمشە، قازىرگى تاڭدا ونداي كوميسسيا جوق. پرەزيدەنت تە، باسقا دا سوتتىڭ ىسىنە ارالاسپايدى. ءبىراق ەندىگى ماسەلەمىز - قىلمىستىق زاڭنامانى ءبىر ىزگە سالۋ. ول تۋرالى پرەزيدەنت بىلتىرعى جولداۋىندا ايتتى. قازىر ماجىلىستە قولدانىستاعى قىلمىستىق-پروتسەسسۋالدىق كودەكس پەن قىلمىستىق اتقارۋ تۋرالى كودەكستى وڭتايلاندىرۋ جانە ونى تۇراقتاندىرۋ تۋرالى زاڭ قارالىپ جاتىر»، - دەدى ابزال قۇسپان.
